શ્રાવણ માસના ત્રીજા સોમવારના પાવન અવસરે પ્રથમ જ્યોતિર્લિંગ સોમનાથ મહાદેવના દર્શન માટે વહેલી સવારથી જ હજારો શ્રદ્ધાળુઓનો ધસારો જોવા મળ્યો હતો. દેશના વિવિધ વિસ્તારોમાંથી આવેલા ભક્તોથી સોમનાથ મંદિર પરિસર ભક્તિમય બની ગયું હતું.
ભગવાન સોમનાથ મહાદેવના કપાટ સવારે 4 વાગ્યે શ્રદ્ધાળુઓ માટે ખોલવામાં આવ્યા હતા. જોકે, દર્શન માટે ભક્તોનો પ્રવેશ વહેલી સવારે 3 વાગ્યાથી જ શરૂ કરી દેવામાં આવ્યો હતો. કપાટ ખુલતાની સાથે જ ભક્તોમાં અનેરો ઉત્સાહ જોવા મળ્યો હતો.
હજારો શ્રદ્ધાળુઓની શિવધૂન અને ‘હર હર મહાદેવ’ના જયઘોષથી સમગ્ર સોમનાથ મંદિર પરિસર ગુંજી ઉઠ્યું હતું. ભક્તિમય વાતાવરણ વચ્ચે શ્રદ્ધાળુઓએ ભગવાન સોમનાથ મહાદેવના દિવ્ય દર્શન કરી ધન્યતા અનુભવી હતી.
શ્રાવણના ત્રીજા સોમવારના વિશેષ દિવસે મહાદેવના દિવ્ય દિગંબર સ્વરૂપના પ્રાકૃતિક દર્શનથી ભક્તો ભાવવિભોર બન્યા હતા. ભગવાનના દર્શન કરતાં અનેક શ્રદ્ધાળુઓએ અનંત આધ્યાત્મિક ઊર્જા અને શાંતિનો અનુભવ કર્યો હતો.
શ્રદ્ધાળુઓની મોટી સંખ્યાને ધ્યાનમાં રાખીને મંદિર પ્રશાસન દ્વારા વિશેષ વ્યવસ્થાઓ કરવામાં આવી હતી. ભક્તોને કોઈ અગવડ ન પડે તે માટે સવારે 3 વાગ્યાથી જ નિઃશુલ્ક સામાનઘર અને જૂતા ઘર સહિતની સુવિધાઓ શરૂ કરવામાં આવી હતી.
View this post on Instagram
દર્શન વ્યવસ્થાને સુવ્યવસ્થિત રાખવા માટે ઝિગઝેગ ક્યુ મેનેજમેન્ટનો ઉપયોગ કરવામાં આવ્યો હતો. અલગ-અલગ ઝોન પ્રમાણે શ્રદ્ધાળુઓનું વર્ગીકરણ કરી તેમને શાંતિપૂર્ણ અને વ્યવસ્થિત રીતે સોમનાથ મહાદેવના દર્શન કરાવવામાં આવ્યા હતા.
વહેલી સવારથી જ મંદિર પરિસરમાં ભક્તોની લાંબી કતારો જોવા મળી હતી. શ્રદ્ધાળુઓ ‘હર હર મહાદેવ’ અને ‘જય સોમનાથ’ના નાદ સાથે દર્શન માટે આગળ વધતા જોવા મળ્યા હતા.
શ્રાવણના ત્રીજા સોમવારે સોમનાથ તીર્થધામ સંપૂર્ણપણે શિવમય બની ગયું હતું. ભક્તિ, આસ્થા અને આધ્યાત્મિકતાના અનોખા સંગમ વચ્ચે હજારો શિવભક્તોએ પ્રથમ જ્યોતિર્લિંગ સોમનાથ મહાદેવના દિવ્ય દર્શન કરી ભગવાનના આશીર્વાદ મેળવ્યા હતા.
શ્રાવણના પાવન સોમવારે સોમનાથ ધામમાં ઉમટેલો આસ્થાનો મહાસાગર ભગવાન સોમનાથ પ્રત્યેની ભક્તોની અતૂટ શ્રદ્ધા અને વિશ્વાસનું જીવંત દૃશ્ય બની રહ્યો હતો.
