જામનગર પંથકમાં વરસાદી માહોલ છવાયેલો છે. લાલપુર તાલુકામાં ગઇકાલે અડધો ઇંચ પાણી વરસ્યુ હતું. જ્યારે અન્યત્ર જામનગર શહેર-જીલ્લામાં છુટો છવાયો વરસાદ જોવા મળ્યો હતો. ગ્રામ્ય વિસ્તારોમાં મોટી ભલસાણમાં અઢી ઇંચ વરસાદથી ઠેર ઠેર પાણી ફરી વળ્યા હતાં.
જામનગર શહેર જિલ્લામાં મેઘરાજાએ અષાઢ મહિનામાં જમાવટ કરી છે. છેલ્લા બે-ચાર દિવસથી સતત વરસાદી માહોલ જોવા મળી રહ્યો છે જોકે ગઇકાલે છુટો છવાયો વરસાદ જોવા મળ્યો હતો. જામનગર જિલ્લાના લાલપુર તાલુકામાં ગઇકાલે અડધો ઇંચ વરસાદ નોંધાયો હતો. જયારે જામનગર, કાલાવડ તથા જામજોધપુરમાં છુટા છવાયા ઝાપટા જોવા મળ્યા હતાં. જ્યારે જોડિયા તથા ધ્રોલમાં મેઘરાજાનો વિરામ રહ્યો હતો. આજે પણ સવારથી જામનગર શહેરમાં વાદળછાયુ વાતાવરણ જોવા મળ્યું હતું. અને વાદળ છાયા વાતાવરણ વચ્ચે જામનગર શહેરમાં છુટા છવાયા વરસાદી ઝાપટા જોવા મળ્યા હતાં. જ્યારે ગઇકાલે ધ્રોલ-જોડિયામાં વિરામ બાદ આજ સવારથી બંને પંથકમાં છુટો છવાયો વરસાદ જોવા મળ્યો હતો.
ગ્રામ્ય વિસ્તારોમાં પણ મેઘરાજાનો મુકામ જોવા મળ્યો હતો. જેમાં જામનગર તાલુકાના મોટી ભલસાણમાં અઢી ઇંચ પાણી વરસી જતાં ખેતરોમાં તથા માર્ગો પર પાણી ફરી વળ્યા હતાં. લાલપુર તાલુકાના મોડપર તથા હરીપરમાં એક-એક ઇંચ વરસાદ નોંધાયો હતો. આ ઉપરાંત લાલપુર તાલુકાના મોટા ખડબા તથા ભણગોરમાં 10-10 મી.મી., પડાણામાં અડધો ઇંચ, પીપરટોડામાં 4 મી.મી., જામનગર તાલુકાના વસઇમાં 4 મી.મી., લાખાબાવળમાં 3 મી.મી., મોટીબાણુગરમાં પ મી.મી.,જોડિયા તાલુકાના હડિયાણા તથા બાલંભામાં 6-6 મી.મી., કાલાવડ તાલુકાના નિકાવામાં 3 મી.મી., ખરેડીમાં 12 મી.મી., મોટા વડાળામાં 5 મી.મી., ભલસાણ બેરાજામાં 10 મી.મી., જામજોધપુર તાલુકાના સમાણામાં 9 મી.મી., શેઠવડાળામાં 8 મી.મી., વાંસજાળીયામાં 6 મી.મી., ધુનડામાં 6 મી.મી., ધ્રાફામાં 8 મી.મી., પરડવામાં 10 મી.મી. વરસાદ છેલ્લા 24 કલાક દરમિયાન નોંધાયો છે.
