ખંભાળિયા નજીક આવેલા નરારા ટાપુ ખાતે વિદ્યાર્થીઓ સાથે સ્કૂલ પિકનિકમાં આવેલી એક બસ આજે અકસ્માતગ્રસ્ત બની હતી. આ અકસ્માતમાં બસમાં સવાર વિદ્યાર્થીઓને નાની-મોટી ઇજાઓ થવા પામી હતી. જોકે કોઈ ગંભીર ઇજા તેમજ નુકસાનીના અહેવાલો સાંપળ્યા નથી. આ સમગ્ર પ્રકરણની જાણવા મળતી વિગત મુજબ ખંભાળિયા તાલુકાના વાડીનાર સ્થિત દરિયાકિનારે આવેલા નરારા ટાપુ ખાતે આજરોજ સવારે વિદ્યાર્થીઓ ભરેલી એક બસ આવી હતી. આ બસ કોઈ કારણોસર રોડની નીચે ઉતરી ગઈ અને એક સાઈડ પલટી ખાઈ ગઈ હતી. આ અકસ્માત બનતા તાકીદે ફાયર બ્રિગેડ સ્ટાફ ઘટના સ્થળે દોડી ગયો હતો અને જરૂરી કામગીરી કરી હતી.
આ અકસ્માતમાં કેટલાક વિદ્યાર્થીઓ તેમજ બસના ચાલકને નાની મોટી ઇજાઓ થવા પામી હતી. જેથી તેઓને સારવાર અર્થે હોસ્પિટલમાં ખસેડવામાં આવ્યા હતા. જો કે કોઈ મોટી જાનહાની કે મોટી નુકસાની ન થતા સૌ કોઈએ રાહતનો દમ ખેંચ્યો હતો. અકસ્માતનો આ બનાવ બનતા થોડો સમય વિદ્યાર્થીઓની ચિચિયારીઓ સાથે ભયનો માહોલ પ્રસરી ગયો હતો.
