જામનગરમાં ફૂટબોલની રમતને પ્રોત્સાહન આપવા અને નાની ઉંમરના ખેલાડીઓને યોગ્ય પ્લેટફોર્મ પૂરું પાડવાના હેતુથી હેનાન સ્પોર્ટ્સ એકેડમી અને હેનાન ફૂટબોલ ક્લબ દ્વારા ‘જામનગર યુથ લીગ સીઝન-1’ ફૂટબોલ ટુર્નામેન્ટનું સફળ આયોજન કરવામાં આવ્યું હતું. અંડર-15 બોયઝ કેટેગરી માટે યોજાયેલી આ ટુર્નામેન્ટમાં શહેરના યુવા ખેલાડીઓએ ભારે ઉત્સાહ અને રમતગમતની ભાવના સાથે ભાગ લીધો હતો. ટુર્નામેન્ટની ફાઇનલ સહિતના મુકાબલાઓમાં ખેલાડીઓની પ્રતિભા, ટીમવર્ક અને જીત મેળવવાની જિજ્ઞાસા જોવા મળી હતી.
સેન્ટ ઝેવિયર્સ સ્કૂલ મેદાનમાં યોજાયેલી આ લીગમાં કુલ છ ટીમોએ ભાગ લીધો હતો. 15 સપ્ટેમ્બરથી શરૂ થયેલી આ સ્પર્ધામાં શુક્રવાર અને શનિવારે મેચો રમાડવામાં આવતી હતી. ખેલાડીઓને વધુમાં વધુ મેચ પ્રેક્ટિસ મળે અને પોતાની રમતનું કૌશલ્ય વિકસાવવાની તક મળે તે હેતુથી સ્પર્ધાનું આયોજન કરવામાં આવ્યું હતું.
ટુર્નામેન્ટનો સૌથી રોમાંચક તબક્કો ફિનિક્સ સ્ટ્રાઇકરની સફર રહી હતી. લીગની શરૂઆતમાં સતત ત્રણ મેચમાં હારનો સામનો કરનાર ફિનિક્સ સ્ટ્રાઇકરની ટીમ પાંચમા ક્રમે પહોંચી ગઈ હતી. શરૂઆતના પરિણામોને કારણે ટીમ માટે આગળ વધવાનો માર્ગ મુશ્કેલ બન્યો હતો, પરંતુ કોચના માર્ગદર્શન, પ્રોત્સાહન અને ખેલાડીઓના આત્મવિશ્વાસથી ટીમે શાનદાર વાપસી કરી હતી.
શરૂઆતની ત્રણ હાર બાદ ફિનિક્સ સ્ટ્રાઇકરના ખેલાડીઓએ સતત પાંચ મેચમાં વિજય મેળવીને પોતાની ક્ષમતા સાબિત કરી હતી. એક પછી એક મુકાબલામાં જીત મેળવીને ટીમે ફાઇનલ સુધીની સફર ખેડી હતી. ક્વોલિફાયર અને એલિમિનેટર રાઉન્ડના પડકારો પાર કરીને ફિનિક્સ સ્ટ્રાઇકરે અંતે ટુર્નામેન્ટની ચેમ્પિયન બનવાનું ગૌરવ મેળવ્યું હતું.
બીજી તરફ, લીગ રાઉન્ડ દરમિયાન પ્રાઇમ યુનાઇટેડ એફસી પોઇન્ટ ટેબલમાં પ્રથમ સ્થાને રહી હતી. જોકે, ફૂટબોલની રમતની અનિશ્ચિતતા અને અંતિમ તબક્કાના રોમાંચક મુકાબલાઓએ ટુર્નામેન્ટને વધુ રસપ્રદ બનાવી હતી. ફિનિક્સ સ્ટ્રાઇકરની આ સફળતા ખેલાડીઓની મહેનત, એકાગ્રતા અને ટીમભાવનાનું પરિણામ બની હતી.
ટુર્નામેન્ટમાં 20-5-20 મિનિટના ફોર્મેટ મુજબ મેચો રમાડવામાં આવી હતી. દરેક ટીમને પાંચ મેચ રમવાની તક મળે તેવું આયોજન કરવામાં આવ્યું હતું. આ પ્રકારના આયોજનથી ખેલાડીઓને માત્ર એકાદ મેચ નહીં, પરંતુ નિયમિત રીતે મેદાનમાં ઉતરી પોતાની રમત સુધારવાની તક મળી હતી.
View this post on Instagram
ટુર્નામેન્ટમાં વિજય મેળવનાર ફિનિક્સ સ્ટ્રાઇકર ટીમના કેપ્ટન ધર્મેશ ગોહિલે પોતાની ખુશી વ્યક્ત કરતાં જણાવ્યું હતું કે, આ પ્રકારની ટુર્નામેન્ટથી બાળકોને સારી મેચ પ્રેક્ટિસ અને પોતાની પ્રતિભા દર્શાવવાની તક મળે છે. ભવિષ્યમાં સ્ટેટ અને નેશનલ લેવલે પણ ફૂટબોલ રમવાની સાથે જામનગરનું નામ રોશન કરવાની તેમની ઇચ્છા છે.
ખેલાડીઓના વાલીઓએ પણ હેનાન સ્પોર્ટ્સ એકેડમી અને હેનાન ફૂટબોલ ક્લબના આ આયોજનને આવકાર્યું હતું. જામનગર જેવા શહેરમાં ફૂટબોલ પ્રત્યે રુચિ ધરાવતા બાળકોને યોગ્ય પ્લેટફોર્મ અને સ્પર્ધાત્મક વાતાવરણ પૂરું પાડવા માટે આવી ટુર્નામેન્ટ અત્યંત ઉપયોગી હોવાનું વાલીઓએ જણાવ્યું હતું. બાળકોને મોબાઇલ અને અન્ય પ્રવૃત્તિઓની સાથે રમતગમત તરફ વાળવા તથા તેમની પ્રતિભાને યોગ્ય દિશા આપવા માટે પણ આવા પ્રયાસો આવકારદાયક હોવાનું તેમણે ઉમેર્યું હતું.
હેનાન સ્પોર્ટ્સ એકેડમીના ફાઉન્ડર જોસેફ દેવરે જણાવ્યું હતું કે, જામનગરમાં ફૂટબોલની રમતને વધુ પ્રોત્સાહન મળે અને પ્રતિભાશાળી બાળકોને પોતાની રમત દર્શાવવા માટે યોગ્ય સ્ટેજ મળી રહે તે હેતુથી જામનગર યુથ લીગનું આયોજન કરવામાં આવ્યું હતું. બાળકોને નિયમિત મેચ પ્રેક્ટિસ, આત્મવિશ્વાસ અને સ્પર્ધાત્મક અનુભવ મળે તે આ આયોજનનો મુખ્ય ઉદ્દેશ્ય હતો. ભવિષ્યમાં પણ આવા આયોજન ચાલુ રાખવામાં આવશે, જેથી વધુને વધુ બાળકોને ફૂટબોલ ક્ષેત્રે આગળ વધવાની તક મળી રહે.
આ ટુર્નામેન્ટમાં વિશેષ ઉપસ્થિતિ તરીકે જામનગર મહાનગરપાલિકાની સ્ટેન્ડિંગ કમિટીના ચેરમેન ધીરેન મોનાણી, જામનગર મહાનગર ભાજપના મહામંત્રી વિજયસિંહ જેઠવા અને પી.ઈ.એફ.આઈ. ગુજરાતના સેક્રેટરી ડૉ. આકાશ ગોહિલ ઉપસ્થિત રહ્યા હતા. આ ઉપરાંત કર્નલ સિધ્ધાર્થસિંધ તથા જામનગર મહાનગરપાલિકાના વોર્ડ નંબર-9ના કોર્પોરેટર પણ ઉપસ્થિત રહ્યા હતા. તેમજ ખબર ગુજરાતના સહતંત્રી મિહિર કાનાણી ખાસ ઉપસ્થિત રહ્યા હતા.
આમ, ‘જામનગર યુથ લીગ સીઝન-1’ માત્ર એક ફૂટબોલ ટુર્નામેન્ટ પૂરતી સીમિત ન રહેતા શહેરના યુવા ખેલાડીઓ માટે નવી તકોનું માધ્યમ બની હતી. ખાસ કરીને શરૂઆતની હાર બાદ સતત પાંચ મેચ જીતીને ચેમ્પિયન બનેલી ફિનિક્સ સ્ટ્રાઇકરની સફરે ખેલાડીઓમાં આત્મવિશ્વાસ અને મહેનતનું મહત્ત્વ ઉજાગર કર્યું હતું. ટુર્નામેન્ટના મીડિયા પાર્ટનર તરીકે ‘ખબર ગુજરાત’ જોડાયું હતું.
