ગુજરાત સરકારના શહેરી વિકાસ અને શહેરી ગૃહ નિર્માણ વિભાગ દ્વારા રાજ્યની કુલ 32 નગરપાલિકા ચીફ ઓફિસરની બદલીના ઓર્ડર કરવામાં આવ્યાં છે. જેમાં જામનગર જિલ્લાની જામજોધપુર, કાલાવડ અને ધ્રોલ નગરપાલિકાના ચીફ ઓફિસરોની પણ બદલી કરાઇ છે.
રાજ્યમાં નગરપાલિકા ચીફ ઓફિસર તરીકે ફરજ બજાવતા 32 અધિકારી-કર્મચારીઓની જાહેર હિતમાં ગુજરાત સરકાર દ્વારા બદલી કરવામાં આવી છે. જેમાં જામનગર જિલ્લાની જામજોધપુર નગરપાલિકામાં ફરજ બજાવતા રઘજીભાઈ પટેલની પંચમહાલ જિલ્લાના ગોધરા નગરપાલિકામાં, જામનગર જિલ્લાના કાલાવડ નગરપાલિકામાં ફરજ બજાવતા મૌલિક વૈંશની ગીર સોમનાથ જિલ્લાના સુત્રાપાડા નગરપાલિકામાં તેમજ જામનગર જિલ્લાની ધ્રોલ નગરપાલિકામાં ફરજ બજાવતા ધર્મેશકુમાર ગોહિલની તાપી જિલ્લાના સોનગઢ નગરપાલિકામાં બદલી કરવામાં આવી છે.
આ ઉપરાંત સુરેન્દ્રનગર જિલ્લાના ચોટીલા નગરપાલિકાના નિકુંજ વોરાની કાલાવડ નગરપાલિકાના ચીફ ઓફિસર તરીકે, જૂનાગઢ જિલ્લાના માંગરોળ નગરપાલિકાના ચીફ ઓફિસર મેહુલભાઈ જોધપુરાની જામજોધપુર નગરપાલિકાના ચીફ ઓફિસર તરીકે તથા દાહોદ નગરપાલિકાના યશપાલસિંહ વાઘેલાની દ્વારકા જિલ્લાના ખંભાળિયા નગરપાલિકા ચીફ ઓફિસર તરીકે અને કચ્છ જિલ્લાના રાપર નગરપાલિકાના ચીફ ઓફીસર રાહુલકુમાર કરમુરની જામનગર જિલ્લાના ધ્રોલ નગરપાલિકાના ચીફ ઓફિસર તરીકે નિમણૂંક કરવામાં આવી છે.
