જામનગરના ગુલાબનગર વિસ્તારમાં રહેણાંક મકાનમાંથી પોલીસે રેઈડ દરમિયાન 21 બોટલ દારૂ સાથે બે શખ્સોને ઝડપી લઇ પૂછપરછ હાથ ધરી હતી. જામનગર તાલુકાના જાંબુડા ગામના ગેઈટ પાસેથી કારને આંતરીને તલાસી લેતા દારૂની ચાર બોટલ મળી આવતા પોલીસે શખ્સની ધરપકડ કરી હતી.
મળતી વિગત મુજબ, જામનગર શહેરના ગુલાબનગરમાં શ્યામ ટાઉનશીપમાં બ્લોક નં.8માં ભાડે મકાનમાં રહેતાં લવજી જાદવ નામના શખ્સના મકાનમાં દારૂનો જથ્થો હોવાની બાતમીના આધારે સિટી બી ડીવીઝન પોલીસે રેઈડ દરમિયાન તલાસી લેતા મકાનમાંથી રૂા.10,500 ની કિંમતની દારૂની 21 બોટલો મળી આવી હતી. જેથી પોલીસે મિલન જાદવ અને કિશોરસિંહ ચંદુભા જાડેજા નામના બે શખ્સોની અટકાયત કરી ગુનો નોંધી પૂછપરછ હાથ ધરી હતી. બીજો દરોડો, જામનગર તાલુકાના જાંબુડા ગામના પાટીયા પાસેથી પસાર થતી જીજે-10-એન-9225 નંબરની કારને પોલીસે આંતરીને તલાસી લેતાં તેમાંથી રૂા.2000 ની કિંમતની દારૂની ચાર બોટલો મળી આવતાં રમેશ ઉર્ફે કુકો પરશોતમભાઈ મારકણા નામના શખ્સની અટકાયત કરી પૂછપરછ હાથ ધરતાં દારૂનો જથ્થો અમરેલીના અક્ષય રમેશ મારકણા પાસેથી ખરીદ્યાની કેફિયતના આધારે પોલીસે બન્ને શખ્સો વિરૂધ્ધ ગુનો નોંધી તપાસ હાથ ધરી હતી.
