કાલાવડ તાલુકાના નિકાવા ગામ નજીક બાઇક પર જતાં યુવાનને સામેથી આવતી બોલેરો પિકઅપવાનના ચાલકે ઠોકર મારી હડફેટ લેતાં અકસ્માતમાં યુવાનનું મોત નિપજ્યું હતું.
અકસ્માતના બનાવની વિગત મુજબ મુળ ભાણવડ તાલુકાના સેવકદેવળિયા ગામના વતની અને હાલ રાજકોટમાં રહી લાકડાનો વ્યવસાય કરતો હાજીભાઇ ઉર્ફે ચીનો હુશેનભાઇ દેથા (ઉ.વ.32) નામનો યુવાન સોમવારે બપોરના સમયે તેના જીજે-36 કે-1303 નંબરના બાઇક પર કાલાવડ તરફ વેપાર માટે જતો હતો તે દરમિયાન નિકાવાથી બે કિ.મી. કાલાવડ તરફ પહોંચ્યો ત્યારે સામેથી પૂરઝડપે આવતી જીજે-10 ટીટી-7089 નંબરના બોલેરો પીકઅપવાનના ચાલકે ટ્રકને ઓવરટેઇક કરવા જતાં સામેથી આવતાં બાઇક સવારને ઠોકરે ચડાવી હડફેટ લેતાં અકસ્માત થયો હતો. આ અકસ્માતમાં બાઇકસવાર હાજીભાઇને શરીરે અને માથામાં ગંભીર ઇજા પહોંચતાં ઘટના સ્થળે મોત નિતજ્યું હતું.
બનાવની જાણ થતાં પીએસઆઇ એચ.વી. પટેલ તથા સ્ટાફ ઘટના સ્થળે દોડી ગયો હતો અને મૃતદેહનો કબજો સંભાળી પીએમ માટે મોકલી મૃતકના ભાઇ અબ્દુલ દેથા નામના યુવાનના નિવેદનના આધારે બોલેરો પીકઅપવાનના ચાલક વિરુધ્ધ ગુનો નોંધી આગળની કાર્યવાહી હાથ ધરી હતી.
