લાલપુરમાં જુગાર સ્થળે પોલીસનો દરોડો, એક જુગારી નાસવા જતાં પટકાયો

લાલપુર ગામમાં રહેતાં શખ્સના મકાનમાં પોલીસે રેઇડ દરમ્યાન પાંચ શખ્સોને રૂા.47,220ની રોકડ સાથે ઝડપી લીધાં હતાં. તેમજ રેઇડ દરમ્યાન નાસવા જતા સમયે છલાગ લગાવતા એક શખ્સ પડી જતાં સારવાર માટે હોસ્પિટલ ખસેડવામાં આવ્યો હતો અને નાશી ગયેલા શખ્સ સહિત 6 શખ્સો વિરૂધ્ધ ગુનો નોંધી આગળની કાર્યવાહી હાથ ધરી હતી. જામનગર શહેરના શંકરટેકરી શાસ્ત્રીનગર વિસ્તારમાં જાહેરમાં તીનપતીનો જુગાર રમતા 6 મહિલાઓને રૂા.13,400ની રોકડ સાથે પોલીસે ઝડપી લીધાં હતાં. લાલપુર તાલુકાના પીપરટોડા ગામમાં જાહેરમાં જુગાર રમતાં 4 શખ્સોને રૂા.3,470ની રોકડ અને મુદ્દામાલ સાથે ઝડપી લઇ આગળની કાર્યવાહી હાથ ધરી હતી. જામજોધપુર ગામમાંથી જુગાર રમતાં બે શખ્સોને પોલીસે રૂા.2,340ની રોકડ અને બે બાઇક સહિત રૂા.67,340ના મુદ્દામાલ સાથે અટકાયત કરી નાશી ગયેલાં 4 સહિતના 6 શખ્સો વિરૂધ્ધ ગુનો નોંધી કાર્યવાહી હાથ ધરી હતી.

જુગાર દરોડાની વિગત મુજબ પ્રથમ દરોડો, લાલપુર ગામમાં રહેતાં પિન્ટુ ચંદુ નદાસણા નામનો શખ્સ તેના મકાનમાં બારથી માણસો બોલાવી તીનપતીનો જુગાર રમાડતો હોવાથી બાતમીના આધારે સ્થાનિક પોલીસે રેઇડ કરતાં પીન્ટુ નદાસણા, કમલેશ દેવાણદ નંદાણીયા, ભરત વેજાણદ કરંગીયા, ગોગન છગન ઓડેદરા, કુસુર ધીરા બેરા નામના પાંચ શખ્સોને રૂા.47,220ની રોકડ અને ગંજીપના સાથે ઝડપી લેવા જતાં હતા ત્યારે કેસુર ધીરા બેરા નામનો શખ્સ નાસવા જતા પડી જવાથી ઇજા પહોંચતા સારવાર માટે હોસ્પિટલમાં ખસેડવામાં આવ્યો હતો. તેમજ છગન નામનો શખ્સ નાશી ગયો હતો. પોલીસે છ શખ્સો વિરૂધ્ધ ગુનો નોંધી આગળની કાર્યવાહી હાથ ધરી હતી.

બીજો દરોડો, જામનગર શહેરના શંકરટેકરી શાસ્ત્રીનગર વિસ્તારમાં જાહેરમાં તીનપતીનો જુગાર રમતા 6 મહિલાઓને પોલીસે રેઇડ દરમ્યાન રૂા.13,400ની રોકડ અને ગંજીપના સાથે ઝડપી લઇ આગળની તપાસ હાથ ધરી હતી. ત્રીજો દરોડો લાલપુર તાલુકાના પીપરટોડા ગામમાંથી તીનપતીનો જુગાર રમતા સિધ્ધરાજસિંહ ઘોઘુભા જાડેજા, લાખુભા મંગુભા જાડેજા, યદુરાજસિંહ દેવુભા જાડેજા, પ્રમોદસિંહ ઉર્ફે પ્રવિણસિંહ જાડેજા નામના ચાર શખ્સોને રૂા.3470ની રોકડ અને ગંજીપના સાથે ઝડપી લીધા હતા.

ચોથો દરોડો જામજોધપુર ગામમાં હવેલી રોડ પર જાહેરમાં તીનપતીનો જુગાર રમતાં રાજીવ ઉર્ફે રાજુ વિનુ જોષી, ભાર્ગવ ઉર્ફે ભગો ગિરિશ ભટ્ટ નામના બે શખ્સોને પોલીસે રેઇડ દરમ્યાન રૂા.2,340ની રોકડ અને રૂા.65,000ની કિંમતના બે બાઇક મળી કુલ રૂા.67,340ના મુદ્દામાલ સાથે ઝડપી લઇ નાશી ગયેલા ભોગીલાલ વાછાણી, રમેશ મકવાણા, ધર્મેશ ઉર્ફે કાનો મણવર, મુકેશ મણવર સહિતના 6 શખ્સો વિરૂધ્ધ ગુનો નોંધી તપાસ હાથ ધરી હતી.