જામનગર મહાનગરપાલિકાની ફુડ શાખા દ્વારા તહેવારો પૂર્વે શહેરમાંથી 1353 કિલો અખાદ્ય જથ્થો ઝડપી લઇ તેનો સ્થળ પર નાશ કરવામાં આવ્યો હતો. તેમજ વાસી ફુડ અંગે 14 પેઢીઓને કુલ રૂા.22500નો દંડ ફટકાર્યો હતો. આ ઉપરાંત એક ડેરીમાંથી દહીંનો નમુનો લેવાયો હતો. જે સબસ્ટાન્ડર્ડ આવતા કેસ દાખલ કરાયો છે.
જામનગર મહાનગરપાલિકા દ્વારા જન્માષ્ટમીના તહેવારો દરમિયાન શહેરભરમાં ચેકીંગ હાથ ધરવામાં આવ્યું હતું. કમિશ્નર દિપેશ કેડીયાના માર્ગદર્શન હેઠળ શહેરીજનોની સુખાકારી માટે હેલ્થી/હાઇઝીન ફુડ તથા ફાસ્ટફુડ/ રેકડીઓમાં વપરાતા ખાદ્યતેલ/પ્રિન્ટેડ પસ્તીના ઉપયોગ તથા હોટલ રેસ્ટોરન્ટમાં વાસીફુડ અંગે તપાસણી હાથ ધરવામાં આવી હતી. જે અંતર્ગત ફુડ વિભાગની ટીમ દ્વારા ગોકુલનગર, જકાતનાકા, જનતા ફાટક, વિરલ બાગ, જોગસ પાર્ક, હોસ્પિટલ રોડ, જુના રેલ્વે સ્ટેશન, ખંભાળિયા ગેઇટ, ખોડીયાર કોલોની, પટેલ કોલોની, વિકાસ ગૃહ રોડ, લીમડા લાઇન, શરૂ સેકશન રોડ, પી.એન. માર્ગ, બર્ધનચોક, સેન્ટ્રલ બેંક, બેડી, ઢીંચડા રોડ, દિગ્જામ સર્કલથી સમર્પણ સર્કલ સુધી, ગુલાબનગર, રાજપાર્ક, લાલવાડી, હાપા સહિતના વિસ્તારોમાં કુલ 152 પેઢીમાં તપાસ હાથ ધરાઇ હતી.
View this post on Instagram
