જોડિયા તાલુકાના માવનુ ગામ તથા અંબાલા ગામના ભરવાડના વાડામાંથી ઘેટા-બકરાની ચોરી કરનાર ગેંગના એક સાગરિતને કેશિયા ગામ પાસેથી એલસીબીની ટીમએ દબોચી લઇ આગળની કાર્યવાહી હાથ ધરી હતી.
આ બનાવની મળતી વિગત મુજબ જોડિયા તાલુકાના માવનુ ગામ તથા અંબાલા ગામમાં આવેલા ભરવાડના વાડામાંથી ઘેટા-બકરાની ચોરી આચરનાર ગેંગની સંડોવણી ખુલી હતી. આ ગેંગના એક સાગરીત અંગેની ક્રિપાલસિંહ જાડેજા, સુમિતભાઇ શિયાર અને ભયપાલસિંહ જાડેજા અને કિશોરભાઇ પરમારને મળેલી સંયુક્ત બાતમીના આધારે પોલીસ અધિક્ષક ડો. રવિ મોહન સૈનીની સૂચનાથી પીઆઈ વી.એમ. લગારીયા, પીએસઆઇ સી. એમ. કાંટેલિયા, પી.એન. મોરી તથા સ્ટાફના હરપાલસિંહ સોઢા, ભરતભાઈ પટેલ, નાનજીભાઈ પટેલ, શરદભાઈ પરમાર, દિલીપભાઈ તલાવાડિયા, હિરેનભાઇ વરણવા, હિતેન્દ્રસિંહ જાડેજા, અરજણભાઈ કોડીયાતર, મયુદીનભાઈ સૈયદ, ક્રિપાલસિંહ જાડેજા, કાસમ બ્લોચ, નિર્મળસિંહ જાડેજા, બળવંતસિંહ પરમાર, મયૂરસિંહ પરમાર, યુવરાજસિંહ ઝાલા, ભયપાલસિંહ જાડેજા, અજયભાઇ વીરડા, કિશોરભાઈ પરમાર, ઋષિરાજસિંહ વાળા, ભરતભાઇ ડાંગર, ઘનશ્યામભાઇ ડેરવાડિયા, સુમિતભાઇ શિયાર, સુરેશભાઇ માલકિયા, ધર્મેન્દ્રસિંહ જાડેજા, દયારામ ત્રિવેદી, બિજલભાઈ બારાસરા, ધર્મેન્દ્રસિંહ જાડેજા, ભારતીબેન ડાંગર સહિતના સ્ટાફે વોચ ગોઠવી હતી.
વોચ દરમિયાન કેશિયા ગામના પાટિયા પાસેથી બાતમી મુજબના કિશોર મનુ તળપદા (ઉ.વ.37, રહે. નડિયાદ, જિ. ખેડા) નામના શખ્સને દબોચી લઇ પૂછપરછ હાથ ધરતાં કિશોર તથા તેની ગેંગના ચાર સહિતના પાંચ શખ્સોએ જોડિયા તાલુકાના માવનુ તથા અંબાલા ગામમાંથી ઘેટાં-બકરાની ચોરી આચર્યાની કેફિયત આપી હતી. જેના આધારે પોલીસે પરસોત્તમ પુંજા તળપદા, નીઝામુદીન મયુદીન શેખ (ગામ માતર, જિ. ખેડા), ગોપાલ ઉર્ફે ગટી તળપદા (રહે. તા.નડિયાદ, જિ. ખેડા), ઠાકોર રયજી તળપદા (રહે. નડિયાદ, ખેડા) નામના ચાર શખ્સોની સંડોવણી ખુલતા એલસીબીએ આ ચારેયની શોધખોળ માટે ચક્રો ગતિમાન કર્યા હતા. તેમજ ઝડપાયેલા કિશોર વિરૂઘ્ધ હિંમતનગર, વડોદરાના વરાસિયા, હિંમતનગર ‘એ’ ડિવિઝન, બાબરા પોલીસ સ્ટેશન, પેટલાદ રૂરલમાં ગુના નોંધાયેલા છે. એલસીબીએ બાકીના ચાર તસ્કર ટોળકીને ઝડપી લેવા તપાસ આરંભી હતી.
