જામનગર એલસીબી પોલીસે એક શખ્સને ત્રણ ચોરાઉ મોટરસાઈકલ સાથે ઝડપી લીધો હતો. આ તસ્કર વિરૂધ્ધ જામનગર શહેર જિલ્લા સહિત કુલ 43 જેટલા ગુનાઓ નોંધાયા હોવાનું પણ સામે આવ્યું છે.
જામનગર એલસીબીના કિશોરભાઈ પરમાર, ભરતભાઈ ડાંગર તથા સુમિતભાઈ શિયારને મળેલી બાતમી ઈ ગુજકોપ પોકેટ કોપથી સર્ચ કરી મળેલી ડીટેઈલના આધારે ચોરીના કેસોની તપાસ હાથ ધરી હતી. જામનગર જિલ્લા પોલીસવડા પ્રેમસુખ ડેલુની સુચના અને એલસીબીના પીઆઇ વી.એમ. લગારીયાના માર્ગદર્શન મુજબ એલસીબીના પીએસઆઈ પી.એન. મોરી, સી.એમ. કાંટેલીયા, પીએસઆઈ એમ.વી. ભાટીયા, ઈન્ચાર્જ પીએસઆઈ સી.એમ. કાંટેલિયા, એએસઆઈ ગોવિંદભાઈ ચૌહાણ, લખધીરસિંહ જાડેજા, કરણસિંહ જાડેજા, ગજેન્દ્રસિંહ જાડેજા, સલીમભાઈ નોયડા, હેકો હાર્દિકભાઈ ભટ્ટ, રણજીતસિંહ પરમાર, મહિપાલભાઈ સાદિયા, ધર્મેન્દ્રસિંહ જાડેજા, પો.કો. ધમેન્દ્રભાઈ પટેલ, દિવ્યરાજસિંહ જાડેજા, એલસીબી હેકો નિર્મળસિંહ જાડેજા તથા પો.કો. બળવંતસિંહ પરમાર સહિતના સ્ટાફે જીતુ જેરામ શેખા નામના શખ્સને ઝડપી લઈ રૂા.20000 ની કિંમતનું જીજે-10-બીએચ-7175 નંબરનું હિરોહોન્ડા હન્ક, રૂા.65000 ની કિંમતનું જીજે-03-કેઆર-4431 નંબરનું બુલેટ તથા રૂા.40000 ની કિંમતનું જીજે-12-બીએન-1402 નંબરનું વાહન સહિત કુલ રૂા.1,25,000 નો મુદ્દામાલ કબ્જે કર્યો હતો.
શખ્સની પૂછપરછ કરતા તેણે જીજે-12-બીએન-1402 નંબરનું મોટરસાઈકલ એકાદ મહિના પૂર્વે રાજકોટ રૈયા ચોકડી હનુમાન મઢી પાસેના રોડ પરથી ડુપ્લીકેટ ચાવી લગાડી ચોરી કર્યાનું કબુલ્યું હતું. તેમજ અન્ય એેક મોટરસાઈકલ બે દિવસ પૂર્વે જામનગરના સાત રસ્તા પ્રદર્શન ગ્રાઉન્ડ સામે આવેલ પુલ નજીક રોડ પરથી ડુપ્લીકેટ ચાવી લગાડીને ચોરી કર્યુ હતું. આ ઉપરાંત આરોપી વિરૂધ્ધ જામનગર-કાલાવડ-રાજકોટ સહિત કુલ 43 જેટલા ગુનાઓ નોંધાઈ ચૂકયા છે.
