જામનગરના ગોકુલનગર પાસેથી એકટીવાચાલકને આંતરીને તલાસી લેતા તેના કબ્જામાંથી રૂા.6000 ની કિંમતની 12 બોટલ દારૂ સાથે શખ્સને ઝડપી લીધો હતો. જામનગર તાલુકાના બેડ ટોલનાકા પાસેથી પસાર થતા શખ્સને આંતરીને તલાસી લેતા તેની પાસેથી દારૂની બોટલ મળી આવતા પોલીસે આગળની કાર્યવાહી હાથ ધરી હતી.
દારૂ અંગેના દરોડાની વિગત મુજબ, પ્રથમ દરોડો જામનગર શહેરના ગોકુલનગર સાયોના શેરીમાંથી જીજે-10-સીકયુ-9074 નંબરના એકટીવા પર પસાર થતા અનિલ રાજુ સારલા નામના શખ્સને સીટી સી ડીવીઝન પોલીસે આંતરીને તલાસી લેતા તેના કબ્જામાંથી રૂા.6000 ની કિંમતની ઈંગ્લીશ દારૂની 12 બોટલ મળી આવતા પોલીસે રૂા.25000 ની કિંમતની એકટીવા અને દારૂનો જથ્થો મળી કુલ રૂા.31000 નો મુદ્દામાલ કબ્જે કરી પૂછપરછ હાથ ધરતા જામનગરના સાગર બિપીન ચાવડા નામના શખ્સે દારૂનો જથ્થો અનિલને સપ્લાય કર્યો હોવાની કેફીયત આપતા પોલીસે બંને શખ્સો વિરૂધ્ધ ગુનો નોંધી સાગરની શોધખોળ આરંભી હતી.
બીજો દરોડો, જામનગર તાલુકાના બેડ ટોલનાકા પાસેથી પસાર થતા પ્રવિણ હરીભાઈ જામ નામના શખ્સને સીક્કા પોલીસે આંતરીને તલાસી લેતા તેના કબ્જામાંથી રૂા.500 ની કિંમતની દારૂની એક બોટલ મળી આવતા પોલીસે પ્રવિણની અટકાયત કરી ગુનો નોંધી આગળની કાર્યવાહી હાથ ધરી હતી.
