જોડિયા તાલુકાના મોરાણા ગામના પાટીયા નજીકથી પસાર થતી ઈનોવા કારને સ્થાનિક પોલીસે આંતરીને તલાસી લેતા તેમાંથી રૂા.87,000 ની કિંમતની 150 બોટલ દારૂ મળી આવતા પોલીસે રૂા.4.92 લાખના મુદ્દામાલ સાથે ઉત્તર પ્રદેશના વતની અને રાજકોટમાં રહેતાં શખ્સને ઝડપી લીધો હતો. જામનગર શહેરના કડિયાવાડમાં રહેતાં શખ્સને તેના મકાનમાંથી 55 નંગ દારૂના ચપલા સાથે ઝડપી લઇ આગળની કાર્યવાહી હાથ ધરી હતી. ગુલાબનગર રાજપાર્ક ઢાળિયા પાસેથી પસાર થતા શખ્સને પોલીસે 27 નંગ ચપલા સાથે દબોચી લીધો હતો.
દારૂના દરોડાની વિગત મુજબ, પ્રથમ દરોડો જોડિયા તાલુકાના મોરાણા ગામના પાટીયા નજીકથી પસાર થનારી કારમાં દારૂનો જથ્થો હોવાની મળેલી બાતમીના આધારે પીએસઆઈ આર.ડી.ગોહિલ તથા સ્ટાફે વોચ ગોઠવી હતી. દરમિયાન બાતમી મુજબની જીજે-03-ડીએન-4671 નંબરની ઈનોવા કાર પસાર થતા પોલીસે આંતરીને તલાસી લેતા કારમાંથી રૂા.81 હજારની કિંમતની 120 બોટલ દારૂ અને રૂા.6000 ની કિંમતની 60 નંગ નાની પ્લાસ્ટિકની દારૂની બોટલો મળી આવતા પોલીસે રૂા.5000 ની કિંમતનો એક મોબાઇલ અને રૂા.87 હજારની કિંમતનો દારૂની 150 બોટલ તથા રૂા.4 લાખની કિંમતની ઈનોવા કાર મળી કુલ રૂા.4,92,000 ના મુદ્દામાલ સાથે ઉત્તરપ્રદેશના વતની અને રાજકોટમાં હાટકેશ્ર્વર વિસ્તારમાં રહેતાં વિશાલસિંઘ સુનિલસિંઘ ઠાકુર નામના શખ્સને ઝડપી લઇ પૂછપરછ હાથ ધરી હતી.
બીજો દરોડો, જામનગર શહેરના કડિયાવાડ વિસ્તારમાં આવેલી મોટુફળીમાં રહેણાંક મકાનમાં દારૂનો જથ્થો હોવાની બાતમીના આધારે સિટી બી ડીવીઝન પોલીસ સ્ટાફે મકાનમાં તલાસી લેતા તેમાંથી રૂા.8250 ની કિંમતના દારૂના 55 નંગ ચપલા મળી આવતા પોલીસે રોહિત જેન્તી ચાવડા નામના શખ્સને ઝડપી લઇ પૂછપરછ હાથ ધરી હતી. ત્રીજો દરોડો, જામનગરના ગુલાબનગર વિસ્તારમાં રાજપાર્કના ઢાળિયા પાસેથી પસાર થતા વૈભવ રમેશ ચતવાણી નામના શખ્સને આંતરીને તલાસી લેતા તેના કબ્જામાંથી રૂા.4050 ની કિંમતના 27 નંગ દારૂના ચપટા મળી આવતા પોલીસે વૈભવની અટકાયત કરી ગુનો નોંધી વધુ પૂછપરછ હાથ ધરી હતી.
