ઘરના ખૂણે-ખૂણાની સફાઈ, અગાસીની ધૂળ ઝાટકવી અને રંગરોગાનની દોડધામ વચ્ચે આપણો ઉત્સાહ તો બેવડાઈ જાય છે, પરંતુ આ બધી મહેનતની સીધી અસર આપણા શરીર અને ખાસ કરીને ચહેરાની ત્વચા પર દેખાય છે. દિવાળીના તહેવારો નજીક હોય ત્યારે ઘર તો ચમકી જાય છે, પણ આપણી ત્વચા ધૂળ, માટી, કેમિકલ્સવાળા ડિટર્જન્ટ્સ અને સતત થાકને કારણે નિસ્તેજ, ડ્રાય અને ડેમેજ થઈ જાય છે. જો તમારી ત્વચા પણ સફાઈના કારણે થાકી ગઈ હોય, તો તહેવારોમાં ખીલી ઉઠવા માટે તેને ખાસ ‘રિફ્રેશમેન્ટ’ની જરૂર છે.
ડીપ ક્લીન્સિંગ અને જેન્ટલ એક્સ્ફોલિયેશન
સફાઈ દરમિયાન ઉડેલી રજકણો અને પ્રદૂષણ ત્વચાના છિદ્રો બ્લોક કરી દે છે.
- હળવા ફેસવોશનો પ્રયોગ: ત્વચા પર સીધા કઠોર કેમિકલ કે સાબુ વાપરવાને બદલે હર્બલ કે જેન્ટલ ફેસવોશથી ચહેરો સાફ કરો.
- મૃત ત્વચા દૂર કરો: ત્વચા પર જામેલા ડેટ સેલ્સને હટાવવા માટે ચણાનો લોટ (બેસન), થોડી હળદર અને દહીં કે કાચા દૂધનું હળવું મિશ્રણ બનાવીને હળવા હાથે સ્ક્રબ કરો.
કુદરતી પોષણ માટે ઇન્સ્ટન્ટ ગ્લો ફેસ પેક
દિવાળીના દીવાઓની જેમ ચહેરા પર પણ ચમક લાવવા રસોડામાં રહેલી પ્રાકૃતિક ચીજો સૌથી મોટો સહારો બને છે:
- ચંદન અને ગુલાબજળ પેક: સફાઈના કારણે ચહેરા પર આવેલી ગરમી, રેડનેસ અને થાક દૂર કરવા ચંદન અને ગુલાબજળ શ્રેષ્ઠ છે.
- પપૈયા અને મધનો માસ્ક: પપૈયાનો થોડો માવો અને મધ ભેળવીને લગાવવાથી ત્વચામાં તાત્કાલિક સોફ્ટનેસ અને કુદરતી ગ્લો આવે છે.
હાથ-પગ અને નખની વિશેષ સંભાળ
ઘરની સફાઈમાં પાણી અને ડિટર્જન્ટના સતત સંપર્કમાં આવવાથી હાથ અને પગની ત્વચા સૌથી વધુ રફ થઈ જાય છે.
- ઘરેલું મેનિક્યોર: નવશેકા પાણીમાં થોડું શેમ્પૂ અને લીંબુનો રસ નાખીને 15 મિનિટ હાથ-પગ બોળી રાખો. ત્યારબાદ હળવા હાથે સાફ કરી ગ્લિસરીન, નારિયેળ તેલ અથવા ગુલાબજળનું મિશ્રણ લગાવો જેથી નખ અને ત્વચાની સોફ્ટનેસ પાછી આવે.
અંદરથી હાઇડ્રેશન અને આરામ
- માત્ર બાહ્ય ક્રીમ કે પેક લગાવવાથી પૂરતું નથી; શરીરને અંદરથી પણ હાઇડ્રેટ રાખવું જરૂરી છે.
- દિવસભર પૂરતું પાણી, નાળિયેર પાણી કે લીંબુ શરબત લો.
- સફાઈની ભારે દોડધામ પછી રાત્રે ઓછામાં ઓછી 7-8 કલાકની ગાઢ ઊંઘ લો જેથી ત્વચા કુદરતી રીતે રિપેર થઈ શકે.
દિવાળી એટલે ઉત્સવોનો રાજા, દીવાઓની રોશની અને ખુશીઓનો માહોલ. આ અદભુત પર્વમાં આપણું ઘર જેટલું ઝળહળે એટલી જ આપણી સુંદરતા અને સ્મિત પણ ખીલેલું હોવું જોઈએ. સફાઈની ભાગદોડ ભલે થોડી થાકાવનારી હોય, પરંતુ થોડી જ કાળજી અને ઘરેલું નુસ્ખાઓ અપનાવીને તમે તમારી ત્વચાને ફરીથી ખીલવી શકો છો. યાદ રાખો, તહેવારોમાં સૌથી મોટો ગ્લો તમારો આત્મવિશ્વાસ અને ખુશી છે તેથી સુંદરતાની સાથે મન પ્રફુલ્લિત રાખીને દિવાળીના પર્વને હર્ષોલ્લાસ સાથે ઉજવો!
(અસ્વીકરણ: સલાહ સહિતની આ સામગ્રી માત્ર સામાન્ય માહિતી પ્રદાન કરે છે. તે કોઈ પણ રીતે યોગ્ય તબીબી અભિપ્રાયનો વિકલ્પ નથી. વધુ વિગતો માટે હંમેશા નિષ્ણાત અથવા તમારા ડૉક્ટરની સલાહ લો.)
