1990નો દશકો ભારતીય ટેલિવિઝન માટે એક ક્રાંતિકારી યુગ હતો. એ સમયે જ્યારે આજના જેવી ટીઆરપીની આંધળી દોડ નહોતી, ત્યારે દૂરદર્શન અને ઝી ટીવી જેવા માધ્યમો પર પ્રસારિત થતા કાર્યક્રમો સીધા દર્શકોના દિલને સ્પર્શતા. 1995માં શરૂ થયેલી એક એવી જ કૉમેડી સિરિયલ એટલે ‘હમ પાંચ’. એકતા કપૂર અને બાલાજી ટેલિફિલ્મ્સના પ્રારંભિક ગાળાની આ કૃતિએ ભારતીય મધ્યમવર્ગીય પરિવારની વ્યાખ્યા અને હાસ્યના માપદંડો કાયમ માટે બદલી નાખ્યા હતા.
‘હમ પાંચ’ એ માત્ર એક ટીવી શો નહોતો, પણ અઠવાડિયામાં એકવાર આખા પરિવારને સાથે બેસાડતો એક ઉત્સવ હતો. આનંદ માથુર, તેમની બે પત્નીઓ (જેમાં એક ફોટો ફ્રેમમાંથી બોલતી!) અને તેમની પાંચ અતરંગી દીકરીઓની વાર્તાએ લોકોને હસાવીને લોથપોથ કરી દીધા હતા.આ સીરિયલની ખાસિયત એ હતી કે તેમાં કોઈ કડવાશ વિનાનું, નિર્ભેળ અને સહજ હાસ્ય હતું. પાંચ દીકરીઓની વિચિત્ર આદતો અને તેમના કારણે મુશ્કેલીમાં મુકાતા બિચારા પિતાની લાચારી દર્શકોને પોતાની લાગતી. દરેક પાત્રનો પોતાનો એક અનોખો અંદાજ અને સિગ્નેચર ડાયલોગ હતો, જે તે સમયે લોકોની જીભે ચડી ગયા હતા.
મુખ્ય કલાકારો: જાણીએ કે આજે આ કલાકારો ક્યાં છે
આ સીરિયલના કલાકારોએ પોતાના અભિનયથી પાત્રોને જીવંત કરી દીધા હતા. ચાલો જાણીએ કે આજે આ કલાકારો ક્યાં છે:
અશોક સરાફ (આનંદ માથુર):
પાંચ દીકરીઓના હેરાન-પરેશાન પિતાની ભૂમિકા ભજવનાર અશોક સરાફ આજે પણ મનોરંજન જગતમાં સક્રિય છે. તેઓ મુખ્યત્વે મરાઠી સિનેમા અને નાટકોમાં મોટું નામ છે. તાજેતરના વર્ષોમાં પણ તેઓ અનેક ફિલ્મો અને સ્ટેજ શોમાં જોવા મળ્યા છે. તેમને વર્ષ 2025 માં ભારત સરકાર દ્વારા કલા ક્ષેત્રે તેમના બહુમૂલ્ય પ્રદાન અને સિનેમા જગતમાં દાયકાઓ સુધી આપેલા લાજવાબ યોગદાન બદલ દેશના ચોથા સર્વોચ્ચ નાગરિક સન્માન ‘પદ્મશ્રી’ થી નવાજવામાં આવ્યા હતા. રાષ્ટ્રપતિ ભવન ખાતે આયોજિત એક વિશેષ સમારોહમાં રાષ્ટ્રપતિ દ્રૌપદી મુર્મૂના હસ્તે તેમને આ એવોર્ડ અર્પણ કરવામાં આવ્યો હતો.આ ઉપરાંત, તેમને વર્ષ 2023માં મહારાષ્ટ્ર સરકારનો સર્વોચ્ચ નાગરિક પુરસ્કાર ‘મહારાષ્ટ્ર ભૂષણ’ પણ મળેલો છે.
પ્રિયા તેંડુલકર (આનંદ માથુરની પહેલી પત્ની):
ફોટો ફ્રેમમાંથી બોલતી અને આનંદ માથુરને ટોણા મારતી તેમની પહેલી પત્નીનું પાત્ર આજે પણ યાદ કરાય છે. અતિશય પ્રતિભાશાળી એવા પ્રિયા તેંડુલકરનું વર્ષ 2002 માં હૃદયરોગના હુમલાને કારણે દુઃખદ અવસાન થયું હતું.
શોમા આનંદ (બીના માથુર):
આનંદ માથુરની લાઉડ અને ડ્રામેટિક બીજી પત્ની બનેલા શોમા આનંદે ત્યારબાદ ‘શરારત’ જેવી સિરિયલો અને ‘હંગામા’ જેવી ફિલ્મોમાં કામ કર્યું. હાલમાં તેઓ લાઈમલાઈટથી થોડા દૂર છે અને પોતાના પરિવાર સાથે સમય વિતાવે છે.
વંદના પાઠક (મીનાક્ષી):
વેલણ લઈને સ્ત્રી સશક્તિકરણની વાતો કરતી સૌથી મોટી દીકરી મીનાક્ષીની ભૂમિકા ગુજરાતી અભિનેત્રી વંદના પાઠકે ભજવી હતી. તેઓ આજે પણ ગુજરાતી નાટકો, ફિલ્મો અને હિન્દી ટીવી સિરિયલો (જેમ કે ‘ખીચડી’ની જયશ્રી) માં ધૂમ મચાવી રહ્યા છે.
વિદ્યા બાલન / અમિતા નાંગિયા (રાધિકા):
ઓછું સાંભળતી અને પુસ્તકીય કીડો બનેલી રાધિકાનું પાત્ર પહેલા અમિતા નાંગિયા અને ત્યારબાદ વિદ્યા બાલને ભજવ્યું હતું. આ શો વિદ્યા બાલનનો ડેબ્યૂ શો હતો. આજે વિદ્યા બાલન બોલિવૂડની ટોચની અને નેશનલ એવોર્ડ વિનિંગ અભિનેત્રી છે.
રાખી વિજાન (સ્વીટી):
દરવાજો ખૂલે એટલે ડાન્સ કરવા માંડતી ‘બ્યુટી વિધાઉટ બ્રેઈન્સ’ જેવી સ્વીટીનું પાત્ર અજોડ હતું. રાખી વિજાન ત્યારબાદ ‘બિગ બોસ’ અને ઘણી ફિલ્મોમાં દેખાયા. તેઓ આજે પણ ટીવી ઇન્ડસ્ટ્રીમાં કામ કરી રહ્યા છે.
ભૈરવી રાયચુરા (કાજલ ભાઈ):
ગુંડા જેવા અંદાજમાં ફરતી ‘કાજલ ભાઈ’ નું પાત્ર ભૈરવી રાયચુરાએ ભજવ્યું હતું. ત્યારબાદ તેમણે ‘બાલિકા વધુ’ જેવી સિરિયલો કરી. હાલમાં તેઓ અભિનયની સાથે-સાથે પોતાનું પ્રોડક્શન હાઉસ (24 Frames) ચલાવે છે અને સફળ પ્રોડ્યુસર છે.
પ્રિયંકા મહેરા (છોટી):
ઘરની સૌથી નાની અને ગોસિપ ક્વીન ‘છોટી’ નું પાત્ર ભજવનાર પ્રિયંકા મહેરા હવે અભિનય છોડીને એક પોપ્યુલર મેગેઝિનમાં ડિજિટલ પ્રોડક્શન અને મીડિયા લાઇનના બેકસ્ટેજ કામમાં વ્યસ્ત છે.
સસ્તી કૉમેડીની સામે એક લાજવાબ જમાનો હતો
આજના સમયમાં જ્યાં કૉમેડીના નામે ડબલ મિનિંગ સંવાદો, બોડી શેમિંગ અથવા કોઈની મજાક ઉડાવીને લાફ્ટર ટ્રેક પાછળ સસ્તી કૉમેડી પીરસવામાં આવે છે, તેની સામે ‘હમ પાંચ’ નો જમાનો અત્યંત સુંદર અને શાલીન હતો.તે સમયે કૉમેડી સિચ્યુએશનલ અને ક્લીન હતી. સ્ક્રિપ્ટ રાઈટિંગ એટલું મજબૂત હતું કે ઘરમાં દાદા-દાદીથી લઈને નાના બાળકો સુધીના તમામ સભ્યો સાથે બેસીને ખડખડાટ હસી શકતા. એ જમાનામાં ટીવી શોઝમાં એક નિર્દોષતા અને પારિવારિક હૂંફ હતી જે આજની ઝાકઝમાળ વચ્ચે ક્યાંક ખોવાઈ ગઈ છે.
‘હમ પાંચ’ એ માત્ર એક સીરિયલ નથી, પણ 90ના દશકાના લોકોની યાદોનો જીવંત દસ્તાવેજ છે. આજે ત્રણ દાયકા પછી પણ જ્યારે એ સીરિયલનું ટાઈટલ ટ્રેક “પમ પમ પમ પાંચ…” સંભળાય છે, ત્યારે ચહેરા પર આપોઆપ સ્મિત આવી જાય છે. ટેકનોલોજી અને ઓટીટીના આ આધુનિક યુગમાં પણ ‘હમ પાંચ’ જેવી ક્લાસિક અને શુદ્ધ કૉમેડી સિરિયલનો જમાનો હંમેશા અદ્વિતીય અને લાજવાબ રહેશે.
