જામનગર શહેરમાં આવેલી પુષ્કરધામ સોસાયટીના ફલેટમાં રહેતાં શખ્સના મકાનમાંથી સિટી ‘એ’ ડિવિઝન પોલીસ સ્ટાફે રેઇડ દરમ્યાન 48 બોટલ દારૂ સાથે ધરપકડ કરી હતી. જામનગરના ન્યુ 80 ફુટ રોડ પરથી બાઇકસવાર બે શખ્સને બિયરના ટીન સાથે ઝડપી લીધા હતા. જામનગરના દરબારગઢ વિસ્તારમાંથી પોલીસે દારૂના ચપટા સાથે શખ્સને ઝડપી લીધો હતો.
દારૂના દરોડાની વિગત મુજબ પ્રથમ દરોડામાં જામનગરની પુષ્કરધામ સોસાયટીમાં આવેલા શિવાલય એપાર્ટમેન્ટના ચોથા માળે, ફલેટ નંબર 404માં દારૂનો જથ્થો હોવાની બાતમીના આધારે સિટી ‘એ’ ડિવિઝન પોલીસ સ્ટાફે રેઇડ દરમ્યાન તલાશી લેતાં ફલેટમાંથી જુદી જુદી બ્રાન્ડની રૂા. 24 હજારની કિંમતની ઇંગ્લીશ દારૂની 48 બોટલ મળી આવતા પોલીસે પારસગર રમેશગર ગૌસ્વામી નામના શખ્સની ધરપકડ કરી પૂછપરછ હાથ ધરતાં દારૂનો જથ્થો જામનગરના ગૌતમ મનોજગીરી ગૌસ્વામી દ્વારા સપ્લાય કરાયાની કેફિયત આપી હતી. જેના આધારે પોલીસે ગૌતમ ગૌસ્વામી વિરૂઘ્ધ પ્રોહિબિશનનો ગુનો નોંધી શોધખોળ આદરી બે શખ્સો સામે આગળની કાર્યવાહી હાથ ધરી હતી.
બીજો દરોડો જામનગર શહેરમાં ન્યુ 80 ફુટ રોડ પર કુબેર પાર્ક રોડ પરથી પસાર થતાં જીજે10-ડીએલ-5547 નંબરના બાઇકસવારને સિટી ‘એ’ ડિવિઝન પોલીસ સ્ટાફે આંતરીને ગોવિંદ મનસુખ ઓઢવિયા અને નરેન્દ્ર અશ્ર્વિન ઠાકોર નામના બે શખ્સની તલાશી લેતાં તેઓની પાસેથી રૂા. 200ની કિંમતના બે બિયરના ટીન મળી આવતાં પોલીસે બાઇક સહિત રૂા. 30,200નો મુદામાલ કબ્જે કરી, ગુનો નોંધી આગળની કાર્યવાહી હાથ ધરી હતી. ત્રીજો દરોડો જામનગર શહેરના દરબારગઢ પોલીસચોકી નજીકના રોડ પરથી પસાર થતાં જીજે10-ઇએ-2186 નંબરના બાઇકચાલક રવિ ઉર્ફે પીન્ટુ ઉર્ફે પોપટ પ્રવીણ ભટ્ટી નામના શખ્સને આંતરીને તલાશી લેતા તેના કબ્જામાંથી રૂા. 200ની કિંમતના દારૂના બે ચપટા મળી આવતા બાઇક સાથે ધરપકડ કરી હતી.
