મહાત્મા ગાંધીજીની જન્મજયંતિ નિમિત્તે જામનગરમાં નશામુક્ત ભારતના સંકલ્પ સાથે વિશેષ જાગૃતિ સાયકલ રેલીનું આયોજન કરવામાં આવ્યું હતું. નશાબંધી અને આબકારી વિભાગ, જામનગર દ્વારા ગાંધી જયંતિ તથા સેવા સંકલ્પ અભિયાન અંતર્ગત યોજાયેલી આ રેલીમાં નશામુક્તિનો સંદેશ જનજન સુધી પહોંચાડવાનો પ્રયાસ કરવામાં આવ્યો હતો.
ચાંદી બજાર ખાતે આવેલી મહાત્મા ગાંધીજીની પ્રતિમા પાસેથી ‘નશામુક્ત ભારત, વ્યસનમુક્ત સમાજ’ ના સંદેશ સાથે સાયકલ રેલીનો પ્રારંભ કરવામાં આવ્યો હતો. રેલીમાં યુવાનો સહિત મોટી સંખ્યામાં લોકો જોડાયા હતા. રેલી દરમિયાન નશાના દુષણથી દૂર રહેવા, વ્યસનમુક્ત જીવન અપનાવવા અને સમાજમાં નશામુક્તિ અંગે જાગૃતિ ફેલાવવાનો સંદેશ આપવામાં આવ્યો હતો.
આ પ્રસંગે રાજ્ય સરકારના મંત્રી પ્રવિણ માળી અને રીવાબા જાડેજા, જામનગરના ધારાસભ્ય દિવ્યેશ અકબરી તેમજ જામનગર નશાબંધી અધિક્ષક સહદેવસિંહ વાળા સહિતના મહાનુભાવો ઉપસ્થિત રહ્યા હતા.
ગાંધી જયંતિના આ પાવન અવસરે મહાત્મા ગાંધીજીના સ્વચ્છતા અને સ્વસ્થ સમાજના સંદેશને યાદ કરવામાં આવ્યો હતો. માત્ર આસપાસની સ્વચ્છતા જ નહીં પરંતુ સમાજને નશા અને વ્યસન જેવી સામાજિક બદીથી પણ મુક્ત રાખવાની જરૂરિયાત પર ભાર મૂકવામાં આવ્યો હતો.
View this post on Instagram
કાર્યક્રમ દરમિયાન ખાસ કરીને યુવા પેઢીને નશાથી દૂર રાખવા અને નશામુક્ત ભારતના નિર્માણમાં યુવાનોની ભૂમિકા વધારવા અંગે જાગૃતિ ફેલાવવામાં આવી હતી. યુવાનો દેશનું ભવિષ્ય હોવાથી તેઓ વ્યસનથી દૂર રહી સ્વસ્થ, સશક્ત અને જવાબદાર નાગરિક બને તે માટે જનજાગૃતિના પ્રયાસો જરૂરી હોવાનું જણાવાયું હતું.
સાયકલ રેલી દરમિયાન ‘નશામુક્ત યુવા, વિકસિત ભારત’ના સંકલ્પ સાથે લોકોમાં જાગૃતિ લાવવામાં આવી હતી. નશાની લત વ્યક્તિના જીવનની સાથે પરિવાર અને સમગ્ર સમાજને પણ અસર કરતી હોવાથી નશામુક્તિ માટે સામૂહિક પ્રયાસો જરૂરી છે તેવો સંદેશ આપવામાં આવ્યો હતો.
ગાંધી જયંતિના દિવસે યોજાયેલી આ રેલી દ્વારા એક તરફ રાષ્ટ્રપિતા મહાત્મા ગાંધીજીના સ્વચ્છ અને સ્વસ્થ સમાજના વિચારોને યાદ કરવામાં આવ્યા તો બીજી તરફ યુવા પેઢીને વ્યસનથી દૂર રાખી નશામુક્ત સમાજના નિર્માણ માટે જનજાગૃતિનો સંદેશ આપવામાં આવ્યો હતો.
આ સાથે જામનગરમાં નશાબંધી સપ્તાહ અને નશામુક્તિ અભિયાનની વિવિધ જનજાગૃતિ પ્રવૃત્તિઓનો પણ પ્રારંભ કરવામાં આવ્યો છે.
