જામનગર જિલ્લાના વાડીનાર પોર્ટ પરથી ભારત માટે રાહતના મહત્વપૂર્ણ સમાચાર સામે આવ્યા છે. મિડલ ઈસ્ટ વિસ્તારમાં વધતા તણાવ અને હોર્મુઝ સ્ટ્રેટ નજીક સર્જાયેલી અનિશ્ચિત પરિસ્થિતિ વચ્ચે LPG લઈને આવતું “જગ વસંત” નામનું વિશાળ જહાજ સફળતાપૂર્વક વાડીનાર નજીક પહોંચી ગયું છે, જે ઊર્જા ક્ષેત્ર માટે સકારાત્મક સંકેત માનવામાં આવી રહ્યો છે.
આ જહાજ અંદાજે 16 હજાર મેટ્રિક ટન LPGનો જથ્થો લઈને આવ્યું છે. ઘરેલુ ગેસ સપ્લાય માટે આ જથ્થો ખૂબ જ મહત્વપૂર્ણ માનવામાં આવે છે, કારણ કે વધતી માંગ અને વૈશ્વિક પરિસ્થિતિ વચ્ચે આવા જથ્થા ભારત માટે ઊર્જા સુરક્ષા મજબૂત બનાવે છે.
મિડલ ઈસ્ટમાં ચાલી રહેલા તણાવને કારણે હોર્મુઝ વિસ્તાર હાલ જોખમી ઝોન તરીકે ગણાય છે. આવા સંજોગોમાં જહાજનું સુરક્ષિત રીતે ભારત તરફ આગમન થવું મોટી રાહત અને વિશ્વાસનું પ્રતીક છે.
View this post on Instagram
મળતી માહિતી મુજબ, “જગ વસંત” જહાજ હાલમાં વાડીનાર પોર્ટથી અંદાજે 10 નોટીકલ માઇલ દૂર એન્કરિંગ કરવામાં આવ્યું છે. પોર્ટ સત્તાધીશો દ્વારા સુરક્ષા વ્યવસ્થા કડક કરવામાં આવી છે અને કામગીરી વધુ સક્રિય બની છે.
આગામી પ્રક્રિયામાં મોટા જહાજમાંથી LPGનો જથ્થો “રોઝ” નામના નાના ટગમાં ટ્રાન્સફર કરવામાં આવશે, જેથી ગેસને સુરક્ષિત રીતે પોર્ટ સુધી પહોંચાડવામાં આવી શકે. આ પ્રક્રિયા સંપૂર્ણ રીતે તકેદારી સાથે હાથ ધરવામાં આવશે.
આ ઘટનાને પગલે વાડીનાર પોર્ટની કામગીરી વધુ ગતિમાન બની છે અને ઊર્જા સપ્લાય ચેન મજબૂત બનવાની શક્યતા વ્યક્ત કરવામાં આવી રહી છે. નિષ્ણાતોના મતે, આવા જહાજોની અવરજવર ચાલુ રહેશે તો દેશની ગેસ સપ્લાયમાં સ્થિરતા આવશે અને ભાવ નિયંત્રણમાં પણ મદદ મળશે.
જહાજના આગમન સાથે જ LPG સપ્લાયને વધુ મજબૂતી મળશે, જે સામાન્ય નાગરિકો માટે રાહતરૂપ સાબિત થશે.
