શાબાશ દ્વારકા પોલીસ : ઉર્જા ટાવર પરથી યુવાન આપઘાત કરે તે પહેલાં બચાવી લીધો – VIDEO

         આ પ્રકરણની વિગત મુજબ મધ્ય પ્રદેશ રાજ્યના વતની એવા હરિ મોહન નામના એક શ્રમિક યુવાન છેલ્લા કેટલાક સમયથી કલ્યાણપુર પંથકમાં રહી અને મજૂરી કામ કરતો હતો. આજરોજ આ યુવાન કલ્યાણપુરથી થોડે દૂર આવેલા નાવદ્રા ગામના દરિયાકાંઠા વિસ્તારમાં પહોંચી ગયો હતો અને અહીંના રહેલા એક ઊર્જાના ટાવર ઉપર ચડી જતા આ બાબત અંગે સ્થાનિક લોકો દ્વારા કલ્યાણપુર પોલીસને જાણ કરવામાં આવી હતી.

        જેને અનુલક્ષીને કલ્યાણપુરના મહિલા પી.એસ.આઈ. યુ.બી. અખેડ તેમજ સ્ટાફના જવાનો આ સ્થળે દોડી ગયા હતા. સિવિલ ડ્રેસમાં ગયેલા પોલીસ સ્ટાફએ પ્રારંભમાં તો ટાવર ઉપર ચડેલા શખ્સને સમજાવવાની કોશિશ કરી હતી. પરંતુ તે ગુજરાતી ભાષા જાણતો ન હતો. પરંતુ પોલીસે હિંમત ન હારી અને બે પોલીસના જવાનો ટાવર ઉપર ચડ્યા હતા અને યેનકેન રીતે હરી મોહનને સમજાવી અને પોતાના ઘરે જવા માટે ભરોસો તેમજ સાંત્વના આપી આ યુવાનને ટાવર પરથી નીચે ઉતાર્યો હતો.

        ત્યાર બાદ આ યુવાનને તેના પરિવારજનો – ભાઈઓ સાથે મધ્યપ્રદેશ જવા માટે રવાના કર્યો હતો. આમ, કલ્યાણપુર પોલીસે સતર્કતા તેમજ કુનેહપૂર્વક એક યુવાનનો જીવ બચાવી અને “પોલીસ પ્રજાનો મિત્ર છે” તે સૂત્રને સાર્થક કરી બતાવ્યું હતું.