કલ્યાણપુર નજીક પુરપાટ જતા ટ્રકની હડફેટે બાઇક ચાલક પ્રૌઢનું કરૂણ મૃત્યુ

કલ્યાણપુર નજીકના હાબરડી માર્ગ પર મોટરસાયકલ ઉપર જઇ રહેલા 55 વર્ષિય એક આહિર પ્રૌઢના મોટરસાયકલને માતેલા સાંઢની જેમ જઈ રહેલા એક ટ્રકના ચાલકે અડફેટે લેતા આ પ્રૌઢનું ઘટના સ્થળ પર જ કરૂણ મૃત્યુ નિપજયુ હતું.
આ ગંભીર બનાવની વિગત મુજબ કલ્યાણપુર તાલુકાના મણીપુર હાબરડી ગામે રહેતા ડાડુભાઈ જીણાભાઈ બાબરીયા નામના 55 વર્ષીય આહીર પ્રૌઢ પોતાના મોટરસાયકલ નંબર જીજે-10-બીબી-6644 પર બેસીને જઈ રહ્યા હતા, ત્યારે હાબરડી ગામના પાટિયા પાસે આવેલી એક સ્કૂલ પાસેથી પુરઝડપે અને બેફિકરાઈપૂર્વક જઈ રહેલા એક ટ્રક નંબર જીજે-12-ડબલ્યુ-8671 ના ચાલકે ડાડુભાઈના મોટરસાયકલને ધડાકાભેર હડફેટે લીધું હતું. જેના કારણે તેઓ બાઇક સાથે ફેંકાઈ ગયા હતા.

આ જીવલેણ ટક્કરમાં બાઇક ચાલક ડાડુભાઈ બાબરીયાને શરીરના જુદા જુદા ભાગોમાં ગંભીર ઈજાઓ થતાં તેમણે સ્થળ ઉપર જ અંતિમ શ્ર્વાસ લીધા હતા. આ બનાવ અંગે મૃતકના પુત્ર કાનાભાઈ ડાડુભાઈ બાબરીયાની ફરિયાદ પરથી કલ્યાણપુર પોલીસે ટ્રકચાલક સામે આઈપીસી કલમ 279, 304(અ), 337, 338, તથા એમ.વી. એક્ટની જુદી-જુદી કલમ મુજબ ગુનો નોંધી ધોરણસરની કાર્યવાહી હાથ ધરી છે.