જામનગર શહેરમાં ઉનાળાની કાળઝાળ ગરમી વચ્ચે પણ ટ્રાફિક પોલીસ પોતાની ફરજ નિષ્ઠાપૂર્વક બજાવી રહી છે. બપોરના તાપમાન વચ્ચે શહેરના સાત રસ્તાથી ખોડીયાર કોલોની તરફ જતા મુખ્ય માર્ગ પર ટ્રાફિક વિભાગ દ્વારા વિશેષ ટ્રાફિક ડ્રાઇવ હાથ ધરવામાં આવી હતી.
આ કામગીરી દરમિયાન ટ્રાફિકના નિયમોનો ભંગ કરતા અનેક વાહનચાલકો સામે કાર્યવાહી કરવામાં આવી હતી. હેલ્મેટ વગર વાહન ચલાવવું, દસ્તાવેજો વગર વાહન હંકારવું, રોંગ સાઈડમાં વાહન દોડાવવું તેમજ ટ્રાફિક સિગ્નલનો ભંગ કરનાર ચાલકોને દંડ ફટકારવામાં આવ્યો હતો.
View this post on Instagram
બપોરના સમયે એક તરફ સખત ગરમી અને બીજી તરફ શહેરના વ્યસ્ત માર્ગો પર સતત વાહનોની અવરજવર વચ્ચે ટ્રાફિક જવાનો રસ્તા પર ઉભા રહી પોતાની ફરજ બજાવતા જોવા મળ્યા હતા. ગરમીની પરવા કર્યા વગર ટ્રાફિકને નિયમિત રાખવા અને અકસ્માતો અટકાવવા માટે પોલીસ દ્વારા સતત ચેકિંગ કરવામાં આવી રહ્યું છે.
શહેરમાં વધતા ટ્રાફિક અને નિયમ ભંગની ઘટનાઓને ધ્યાનમાં રાખીને ટ્રાફિક વિભાગ દ્વારા સમયાંતરે આવી ડ્રાઇવ યોજવામાં આવે છે. પોલીસનું કહેવું છે કે વાહનચાલકો પોતાનો અને અન્ય લોકોનો જીવ સુરક્ષિત રહે તે માટે ટ્રાફિકના નિયમોનું પાલન કરે તે અત્યંત જરૂરી છે.
ટ્રાફિક પોલીસની આ કામગીરીને કારણે મુખ્ય માર્ગ પર થોડા સમય માટે વાહનોની ધીમી અવરજવર જોવા મળી હતી, પરંતુ નિયમ ભંગ કરતા ચાલકો સામે કડક સંદેશો પહોંચાડવામાં સફળતા મળી હતી.
