જામનગર શહેરના લાલવાડી વિસ્તારમાં આવેલા જગન્નાથ પાર્ક પાસે સ્થિત મહાવીર આઈસ્ક્રીમના ગોડાઉનમાં ચોરીની ઘટના સામે આવતા વિસ્તારમાં ચકચાર મચી ગઈ છે. મોડી રાત્રિના સમયે અજાણ્યા શખ્સોએ ગોડાઉનમાં ઘૂસી ચોરીને અંજામ આપ્યો હોવાનું સામે આવ્યું છે.
પ્રાથમિક માહિતી મુજબ, ગોડાઉનમાં પ્રવેશેલા શખ્સોની સમગ્ર હિલચાલ ત્યાં લાગેલા સીસીટીવી કેમેરામાં કેદ થઈ ગઈ હોવાનું જાણવા મળ્યું છે. વાયરલ થયેલા સીસીટીવી વીડિયોમાં કેટલાક શખ્સો ગોડાઉનની આસપાસ ફરી રહ્યા હોવા સાથે અંદર પ્રવેશતા પણ નજરે પડી રહ્યા હોવાનું કહેવાય છે.
ચોરીની ઘટના સામે આવ્યા બાદ વેપારી વર્તુળોમાં પણ ચિંતા ફેલાઈ છે. ખાસ કરીને રાત્રિના સમયે સુરક્ષાની વ્યવસ્થા સામે અનેક સવાલો ઊભા થયા છે. સ્થાનિક લોકોના જણાવ્યા મુજબ, છેલ્લા કેટલાક સમયથી વિસ્તારમાં ચોરીની નાની-મોટી ઘટનાઓમાં વધારો જોવા મળી રહ્યો છે.
View this post on Instagram
સોશિયલ મીડિયામાં વાયરલ થયેલા વીડિયોને લઈને લોકોમાં પણ ભારે ચર્ચા ચાલી રહી છે. વીડિયોમાં ગોડાઉનમાં ઘૂસેલા શખ્સોની હિલચાલ સ્પષ્ટ દેખાઈ રહી હોવાનું કહેવાઈ રહ્યું છે, જેના આધારે આરોપીઓ સુધી પહોંચવામાં મદદ મળી શકે તેવી શક્યતા વ્યક્ત કરવામાં આવી રહી છે.
ઘટનાની જાણ થતાં સ્થાનિક પોલીસ પણ હરકતમાં આવી હોવાનું જાણવા મળ્યું છે. પોલીસ દ્વારા સીસીટીવી ફૂટેજના આધારે તપાસ હાથ ધરવામાં આવી રહી છે અને ગોડાઉનમાંથી શું ચોરી થયું તેમજ કેટલું નુકસાન થયું તે અંગે વધુ માહિતી મેળવવાની કાર્યવાહી ચાલુ હોવાનું જાણવા મળે છે.
