જામનગર જિલ્લાના કાલાવડ તાલુકાના રવેશિયા ગામ નજીક વાડી વિસ્તારમાં સિંહ દેખાયો હોવાનો ફોટો સામે આવતા ખેડૂતો અને ખેતમજૂરોમાં ભયનો માહોલ જોવા મળ્યો છે. વાડીની બાજુમાં સિંહ નજરે પડતાં સ્થાનિક ખેડૂતના મોબાઇલ કેમેરામાં સમગ્ર દૃશ્ય કેદ થયું હોવાનું જાણવા મળે છે.
મળતી માહિતી મુજબ, રવેશિયા ગામે વાડી વિસ્તારમાં સિંહની હાજરી જોવા મળતાં આસપાસના ખેડૂતોમાં ચિંતા ફેલાઈ છે. સિંહ વાડીની બાજુમાં બેઠેલો નજરે પડતો હોવાનો ફોટો મોબાઇલમાં લેવામાં આવ્યો હતો. ફોટો સામે આવ્યા બાદ ગ્રામ્ય વિસ્તારમાં સિંહની હાજરીને લઈને ચર્ચા શરૂ થઈ છે.
ખેડૂતો દ્વારા જણાવવામાં આવી રહ્યું છે કે, વાડી વિસ્તારમાં સિંહની અવરજવર રહેતી હોય તો ખેતરમાં કામ કરવા જતાં ખેડૂતો અને ખેતમજૂરોમાં ભય રહે છે. ખાસ કરીને વહેલી સવારે અને મોડી સાંજે વાડી વિસ્તારમાં જતા ખેડૂતો વધુ સાવચેતી રાખી રહ્યા છે.
સિંહની હાજરી અંગે વનવિભાગ દ્વારા સ્થળ તપાસ કરી જરૂરી કાર્યવાહી કરવામાં આવે અને ખેડૂતોને સિંહની અવરજવર અંગે યોગ્ય માહિતી આપવામાં આવે તેવી સ્થાનિકોમાં માંગ ઉઠી છે. ખેડૂતોને પણ એકલા વાડી વિસ્તારમાં ન જવા તથા સિંહ દેખાય તો તેની નજીક જવાને બદલે સલામત અંતર જાળવવાની અપીલ કરવામાં આવી રહી છે.
