પીજીવીસીએલ દ્વારા સતત ત્રીજા દિવસે હાથ ધરેલ વીજ ચેકિંગમાં જામનગર શહેર-જિલ્લામાંથી વધુ રૂપિયા 1રર.40 લાખની વીજ ચોરી ઝડપી લીધી હતી. 3 દિવસમાં 206 લાખ જેટલી વીજ ચોરી પીજીવીસીએલ દ્વારા ઝડપાઇ છે.
પીજીવીસીએલ દ્વારા સપ્તાહના પ્રારંભે સોમવારથી જામનગર સહિત હાલાર પંથકમાં વીજ ચોરીના દુષણને ડામવા કડક વીજ ચેકિંગ કામગીરી હાથ ધરી છે. સતત 3 દિવસથી અધિક્ષક ઇજનેરના માર્ગદર્શન હેઠળ પીજીવીસીએલની ટુકડીઓ દ્વારા જામનગર શહેર સહિત હાલાર પંથકમાં વીજ ચેકિંગ કરાઇ રહયું છે. ગઇકાલે બુધવારે જામનગર શહેરના સનસીટી, મહાપ્રભુજી બેઠક, કાલાવડ નાકા બહારની સોસાયટીઓ, બેડી રીંગ રોડ પાસેની સોસાયટીઓ ઉપરાંત જામનગર તાલુકાના મોટી ખાવડી, નાની ખાવડી, શાપર, મોટા લખિયા, વસઇ, બેડ, નાઘેડી સહિતના ગ્રામ્ય પંથકો અને લાલપુર તાલુકાના હરિપર, લાલપુર સહિતના ગ્રામ્ય વિસ્તારોમાં પીજીવીસીએલની 47 જેટલી ટીમો દ્વારા 20 લોકલ પોલીસ તથા 12 એસઆરપી જવાનોના સુરક્ષા બંદોબસ્ત સાથે વીજ ચેકિંગ હાથ ધર્યુ હતું.
જેમાં કુલ 580 જેટલા વીજ જોડાણો ચેક કરવામાં આવ્યા હતા. જે પૈકી 90 વીજ જોડાણોમાં ગેરરીતિ ઝડપાતા અંદાજિત 122.40 લાખની વીજ ચોરી ઝડપી લઇ પુરવણી બિલો ફટકારી કાર્યવાહી હાથ ધરી હતી. છેલ્લા 3 દિવસમાં કુલ 200 લાખથી વધુની વીજચોરી ઝડપાઇ છે. પીજીવીસીએલના ચેકિંગને લઇ વીજ ચોરોમાં ફફડાટ ફેલાયો હતો.