જામનગર-લાલપુર ધોરીમાર્ગ પરથી પસાર થતી ઈકો કારને લાલપુર પોલીસે આંતરીને તલાસી લેતમાં તેમાંથી રૂા.26 હજારની કિંમતની બાવન બોટલ ઈંગ્લીશ દારૂ મળી આવતા શખ્સની ધરપકડ કરી હતી. જામનગર નજીક ખીજડિયા બાયપાસ પાસેથી પોલીસે એક શખ્સને 48 બોટલ દારૂ અને 48 નંગ ચપલા તથા કાર અને મોબાઇલ મળી કુલ રૂા.2,79,000 ના મુદ્દામાલ સાથે શખ્સને ઝડપી લીધો હતો.
દારૂના દરોડાની વિગત મુજબ પ્રથમ દરોડો લાલપુર નજીક જામનગર ધોરીમાર્ગ પરથી પસાર થતી જીજે-10-ડીએ-0764 નંબરની ઈકોકારને આંતરીને સ્થાનિક પોલીસે તલાસી લેતા તેમાંથી રૂા.26000 ની કિંમતની બાવન બોટલ દારૂ મળી આવતા પોલીસે લાલપુરના ઈરફાન તારમામદ ઘોઘા નામના શખ્સને દબોચી લઇ પૂછપરછ હાથ ધરતા દારૂનો જથ્થો જીજ્ઞેશ ઉર્ફે જીગો રતિલાલ ચોપડા પાસેથી ખરીદ કર્યાની કેફિયત આપતા પોલીસે બંને શખ્સો વિરૂધ્ધ ગુનો નોંધી દારૂનો જથ્થો તથા કાર કબ્જે કરી હતી.
બીજો બનાવ, જામનગર નજીક ખીજડિયા બાયપાસ પાસેથી પસાર થતા કારચાલકને આંતરીને તલાસી લેતા કારમાંથી રૂા.19200 ની કિંમતની 48 બોટલ દારૂ અને રૂા.4800 ની કિંમતના 48 નંગ ચપલા મળી આવતા પોલીસે ઈકો કાર અને દારૂનો જથ્થો મળી કુલ રૂા.2,79,000 ના મુદ્દામાલ સાથે રાહુલ ઉર્ફે ગદુ બચુભાઈ ચાવડા નામના શખ્સની ધરપકડ કરી પૂછપરછ હાથ ધરતા આ દારૂનો જથ્થો કચ્છના સામખીયારીના શ્યામ દ્વારા સપ્લાય કરાયો હોવાની કેફીયત આપતા પીએસઆઈ જે.પી. સોઢા તથા સ્ટાફે ગુનો નોંધી તપાસ આરંભી હતી.
