જામનગર જિલ્લાના મેઘપર ગામમાં ઈકો કારમાં દારૂની હેરાફેરી કરતા બે શખ્સોને પોલીસે રૂા.54,000 ની કિંમતની દારૂની 108 બોટલો અને કાર સહિત રૂા.3,59,500 ના મુદ્દામાલ સાથે ઝડપી લઇ સપ્લાયરની શોધખોળ હાથ ધરી હતી. જામનગરના પટેલ કોલોની વિસ્તારમાં આવેલી ઓફિસમાંથી પોલીસે 45 બોટલ દારૂ સાથે શખ્સને ઝડપી લીધો હતો. જામનગરના દિ.પ્લોટ 57માંથી પોલીસે શખ્સને 13 બોટલ દારૂ સાથે ઝડપી લીધો હતો. જામનગરના બેડેશ્ર્વર વિસ્તારમાંથી શખ્સને પાંચ બોટલ દારૂ સાથે ઝડપી લીધો હતો.
દારૂ અંગેના દરોડાની વિગત મુજબ પ્રથમ દરોડો જામનગર તાલુકાના મેઘપર ધોરી માર્ગ પર દારૂની હેરાફેરી કરાતી હોવાની બાતમીના આધારે પોલીસે રેઈડ દરમિયાન જીજે-13-એએચ-2551 નંબરની ઈકો કારને આંતરીને તલાસી લેતા તેમાંથી રૂા.54,000ની કિંમતની 108 બોટલ દારૂ મળી આવતા પોલીસે કરણ વશરામ યાદવ, પુનીત બીપીન દાણીધાર નામના બે શખ્સોને ઝડપી લઇ તેમની પાસેથી રૂા.5500 ની કિંમતના બે નંગ મોબાઇલ અને દારૂનો જથ્થો તથા રૂા.3 લાખની કિંમતની કાર સહિત કુલ રૂા.3,59,500 નો મુદ્દામાલ કબ્જે કર્યો હતો અને પૂછપરછ હાથ ધરતા આ દારૂનો જથ્થો ગીરીરાજસિંહ બલભદ્રસિંહ જાડેજા દ્વારા સપ્લાય કરાયાની કેફીયત આપતા પોલીસે ત્રણ શખ્સો વિરૂધ્ધ ગુનો નોંધી સપ્લાયરની શોધખોળ માટે ચક્રો ગતિમાન કર્યા હતાં.
બીજો દરોડો, જામનગર શહેરના પટેલ કોલોની વિસ્તારમાં આવેલા આસિયાના કોમ્પલેક્ષમાં પ્રથમ માળે આવેલી નિલેશ દિક્ષીત નામના વેપારીની ઓફિસમાંથી પોલીસે રેઇડ દરમિયાન તલાસી લેતા રૂા.22,500 ની કિંમતની 45 બોટલ દારૂ મળી આવતા પોલીસે નિલેશની ધરપકડ કરી વધુ તપાસ હાથ ધરી હતી
ત્રીજો દરોડો, જામનગર શહેરના દિગ્વીજય પ્લોટ 57 માંથી પસાર થતા ભાવેશ શશીકાંત કટારમલ નામના શખ્સને સિટી એ ડીવીઝન પોલીસે આંતરીને તલાસી લેતા તેના કબ્જામાંથી રૂા.6500 ની કિંમતની 13 બોટલ ઈંગ્લીશ દારૂ મળી આવતા પોલીસે ભાવેશની ધરપકડ કરી આગળની કાર્યવાહી હાથ ધરી હતી.
ચોથો દરોડો, જામનગર શહેરના બેડેશ્ર્વર વિસ્તારમાંથી પસાર થતા ભરતસિંહ વખતસિંહ ઝાલા નામના શખ્સને આંતરીને તલાસી લેતા તેના કબ્જામાંથી રૂા.2500 ની કિંમતની 5 બોટલ ઈંગ્લીશ દારૂ મળી આવતા પોલીસે ભરતસિંહની અટકાયત કરી ગુનો નોંધી પૂછપરછ હાથ ધરી હતી.
