જામનગર જિલ્લાના નવાગામ-પીપળી ગામ જવાના માર્ગ પર વોંકળાના કાંઠેથી એલસીબીની ટીમે રૂા.2.59 લાખની કિંમતની 648 બોટલ અને એક ટ્રક મળી કુલ રૂા.7.59 લાખનો મુદ્દામાલ કબ્જે કરી ટ્રકચાલકની શોધખોળ આરંભી હતી. જામનગર શહેરના ઉદ્યોગનગર વિસ્તારમાંથી એક શખ્સને દારૂની બોટલ સાથે અને ભીમવાસ વિસ્તારમાંથી એક શખ્સને દારૂની બોટલ સાથે ઝડપી લીધો હતો.
દારૂ અંગેના દરોડાની વિગત મુજબ, જામનગર જિલ્લાના નવાગામથી પીપળી જવાના માર્ગ વચ્ચે આવતી વોંકળા અને નદી વચ્ચે ટ્રકમાં દારૂનો જથ્થો હોવાની એલસીબીના એએસઆઈ સંજયસિંહ વાળા, દિલીપ તલાવડિયા, હિતેન્દ્રસિંહ જાડેજા, ભગીરથસિંહ સરવૈયાને મળેલી સંયુકત બાતમીના આધારે જિલ્લા પોલીસ અધિક્ષક પ્રેમસુખ ડેલુની સૂચનાથી એલસીબી પીઆઈ કે.કે. ગોહિલની માર્ગદર્શન હેઠળ ટીમે રેઈડ દરમિયાન જીજે-12-યુ-7460 નંબરના ટ્રકની તલાસી લેતા તેમાંથી રૂા.2,59,200 ની કિંમતની જુદી-જુદી બનાવટની દારૂની 648 બોટલ અને રૂા.500000 ની કિંમતનો ટ્રક સહિત કુલ રૂા.7,59,200 ની કિંમતનો મુદ્દામાલ કબ્જે કર્યો હતો. જો કે, આરોપીઓ અને ટ્રકચાલક નાશી ગયા હોય જેથી એલસીબીની ટીમે મુદ્દામાલ કબ્જે કરી ટ્રકચાલકની શોધખોળ માટે ચક્રો ગતિમાન કર્યા હતાં.
જામનગરના ઉદ્યોગનગર વિસ્તારમાંથી પસાર થતા અલ્કેશ મુળુ બંધીયા નામના શખ્સને સિટી સી ડીવીઝન પોલીસ સ્ટાફે આંતરીને તલાસી લેતા તેના કબ્જામાંથી રૂા.500 ની કિંમતની દારૂની એક બોટલ અને રૂા.10 હજારની કિંમતનો મોબાઇલ મળી આવતા અટકાયત કરી પૂછપરછ હાથ ધરતા દારૂનો જથ્થો પરેશ ભાનુશાળી પાસેથી ખરીદ્યાની કેફીયત આપતા પોલીસે બે શખ્સો વિરૂધ્ધ ગુનો નોંધી કાર્યવાહી હાથ ધરી હતી. જામનગરના ભીમવાસ શેરી નં.1માંથી સિટી બી ડીવીઝને સુનિલ ઉર્ફે ટકો રમેશ વાઘેલા નામના શખ્સને આંતરીને તલાસી લેતા તેના કબ્જામાંથી દારૂની બોટલ મળી આવતા પોલીસે અટકાયત કરી આગળની કાર્યવાહી હાથ ધરી હતી.
