ચાંદીપુરા વાયરસને લઈને જામનગર જિલ્લામાં આરોગ્ય તંત્રની સતર્કતા વચ્ચે જામનગરની સરકારી જીજી હોસ્પિટલમાં વધુ એક બાળદર્દી શંકાસ્પદ લક્ષણો સાથે સારવાર માટે દાખલ કરવામાં આવી છે. કનસુમરાના પાટીયા પાસે આવેલી સ્વામિનારાયણ સોસાયટીમાં રહેતી ત્રણ વર્ષની બાળકીમાં ચાંદીપુરા જેવા લક્ષણો જોવા મળતા તેને તાત્કાલિક સારવાર અર્થે જીજી હોસ્પિટલમાં ખસેડવામાં આવી હોવાનું જાણવા મળ્યું છે.
મળતી માહિતી મુજબ, ત્રણ વર્ષીય બાળકીની તબિયતમાં ચાંદીપુરા સંબંધિત શંકાસ્પદ લક્ષણો જણાતા શુક્રવારે સાંજે પરિવારજનો દ્વારા તેને સારવાર માટે જીજી હોસ્પિટલમાં લાવવામાં આવી હતી. હોસ્પિટલમાં તબીબોની ટીમ દ્વારા બાળકીની જરૂરી તબીબી તપાસ હાથ ધરવામાં આવી છે અને તેની સ્થિતિ પર સતત નજર રાખવામાં આવી રહી છે. ચાંદીપુરા જેવા લક્ષણો જોવા મળતા બાળકીને તબીબી નિરીક્ષણ હેઠળ રાખી જરૂરી સારવાર શરૂ કરવામાં આવી છે. હાલ તબીબોના જણાવ્યા મુજબ બાળકીની સ્થિતિમાં સુધારો જોવા મળી રહ્યો છે અને તેની તબિયત હાલ સ્થિર હોવાનું જાણવા મળે છે.
જામનગરની જીજી હોસ્પિટલમાં ચાંદીપુરાના શંકાસ્પદ કેસોની સંખ્યા હવે કુલ 13 પર પહોંચી હોવાનું સામે આવ્યું છે. અત્યાર સુધી નોંધાયેલા 13 શંકાસ્પદ કેસોમાંથી એક કેસ પોઝિટિવ આવ્યો છે, જ્યારે 11 દર્દીઓના રિપોર્ટ નેગેટિવ નોંધાયા છે. જ્યારે એક દર્દીનો રિપોર્ટ હજુ પેન્ડિંગ છે.
ચાંદીપુરાના શંકાસ્પદ કેસો સામે આવતા જીજી હોસ્પિટલ તંત્ર દ્વારા પણ વિશેષ તકેદારી રાખવામાં આવી રહી છે. શંકાસ્પદ લક્ષણો ધરાવતા બાળદર્દીઓને તાત્કાલિક સારવાર, નિરીક્ષણ અને જરૂરી તપાસ હેઠળ રાખવામાં આવી રહ્યા છે. ખાસ કરીને બાળકોમાં તાવ સહિતના ચાંદીપુરા સંબંધિત લક્ષણો દેખાય ત્યારે પરિવારજનો દ્વારા તાત્કાલિક તબીબી સારવાર લેવી જરૂરી હોવાનું આરોગ્ય તંત્ર દ્વારા વારંવાર જણાવવામાં આવે છે. હાલ કનસુમરા પાટીયા નજીકની સ્વામિનારાયણ સોસાયટીમાં રહેતી ત્રણ વર્ષની બાળકી જીજી હોસ્પિટલમાં તબીબોની દેખરેખ હેઠળ સારવાર લઈ રહી છે. બાળકીની તબિયતમાં સુધારો જોવા મળતા તબીબી ટીમ દ્વારા રાહત અનુભવાઈ રહી છે.
ચાંદીપુરા અંગે શંકાસ્પદ કેસોની સંખ્યા વધતી હોવાના પગલે જામનગરના આરોગ્ય વિભાગ અને જીજી હોસ્પિટલ તંત્ર દ્વારા પણ સાવચેતીના પગલાં વધુ મજબૂત બનાવવામાં આવ્યા છે. શંકાસ્પદ કેસોના નમૂનાઓની જરૂરી તપાસ કરવામાં આવી રહી છે અને રિપોર્ટના આધારે આગળની સારવાર તથા તબીબી કાર્યવાહી નક્કી કરવામાં આવી રહી છે.
જામનગરમાં અત્યાર સુધી નોંધાયેલા 13 શંકાસ્પદ કેસોમાં એક પોઝિટિવ, 11 નેગેટિવ અને એક રિપોર્ટ બાકી હોવાની સ્થિતિ વચ્ચે હવે વધુ એક ત્રણ વર્ષની બાળકી શંકાસ્પદ લક્ષણો સાથે હોસ્પિટલમાં દાખલ થતા આરોગ્ય તંત્ર દ્વારા મામલે ગંભીરતાથી નજર રાખવામાં આવી રહી છે.
