લક્ષ્મીનારાયણ મંદિર ખાતે તા. 16-01-2026 (શુક્રવાર)ના રોજ લક્ષ્મીનારાયણ ભગવાનના 42મા પાટોત્સવ નિમિત્તે પરંપરા મુજબ ભવ્ય શાકોત્સવનું આયોજન કરવામાં આવ્યું હતું. આ પાવન ધાર્મિક કાર્યક્રમ જામનગર શહેરના લીમડાલાઈન વિસ્તારમાં આવેલ આણદાબાવા અનાથાલય પરિસર ખાતે યોજાયો હતો, જ્યાં વહેલી સવારથી જ ભક્તિમય અને ધાર્મિક વાતાવરણ છવાઈ ગયું હતું.
આ શુભ અવસરે ભગવાન લક્ષ્મીનારાયણને વિવિધ પ્રકારના શાક, મીઠાઈઓ, ફળફળાદિ અને અન્નના વૈવિધ્યસભર અન્નકૂટ અર્પણ કરવામાં આવ્યા હતા. બપોરે 12:00 થી 1:00 દરમિયાન અન્નકૂટ દર્શનનું આયોજન કરવામાં આવ્યું હતું. જેમાં જામનગર શહેર તેમજ આસપાસના વિસ્તારોમાંથી મોટી સંખ્યામાં હરિભક્તોએ ઉમટી પડી ભગવાનના દર્શન કરીને પુણ્યલાભ મેળવ્યો હતો.
View this post on Instagram
કાર્યક્રમ અંતર્ગત બપોરે 12:15 કલાકે મહાઆરતીનું આયોજન કરવામાં આવ્યું હતું. મહાઆરતી દરમિયાન ભક્તોએ ભક્તિભાવપૂર્વક આરતીમાં ભાગ લઈ સમગ્ર પરિસરને ભજન-કીર્તનથી ગુંજાયમાન કરી દીધો હતો. આરતી બાદ બપોરે 1:00 કલાકે મહાપ્રસાદનું વિતરણ કરવામાં આવ્યું હતું, જેમાં હજારો ભક્તોએ પ્રસાદનો લાભ લીધો હતો.
લક્ષ્મીનારાયણ મંદિર ખાતે દર વર્ષે પાટોત્સવ તથા શાકોત્સવનું આ રીતે પરંપરાગત આયોજન કરવામાં આવે છે. આ ઉત્સવ ભક્તિ, શ્રદ્ધા અને સેવા ભાવનાનું ઉત્તમ ઉદાહરણ બની રહ્યો છે અને દર વર્ષે મોટી સંખ્યામાં ભક્તોને આકર્ષે છે. આ સમગ્ર ધાર્મિક કાર્યક્રમનું આયોજન આણદાબાવા સેવા સંસ્થા, જામનગર દ્વારા કરવામાં આવ્યું હતું. સંસ્થાના સેવાભાવી કાર્યકરો દ્વારા તમામ વ્યવસ્થાઓ સુચારુ રીતે સંભાળવામાં આવી હતી, જેના કારણે આણદાબાવા અનાથાલય પરિસર ખાતે ભક્તોએ શાંતિપૂર્ણ અને સુવ્યવસ્થિત રીતે દર્શન તથા મહાપ્રસાદનો લાભ લીધો હતો.
