કાલાવડ તાલુકાના બેડિયા ગામમાં આવેલા રહેણાંક મકાનમાંથી 25 દિવસ પહેલાં યુવાનના ઘરમાં થયેલી સોના-ચાંદીના દાગીના અને રોકડ મળી કુલ રૂા.7.76 લાખની માલમતાની ચોરીના બનાવમાં એલસીબીએ તસ્કરને દબોચી લઇ તેની પાસેથી રૂા.1.94 લાખનો મુદ્દામાલ કબ્જે કરી અન્ય બે સાગરિતોની શોધખોળ માટે ચક્રો ગતિમાન કર્યા હતાં.
મળતી વિગત મુજબ, કાલાવડ તાલુકાના બેડિયા ગામમાં રહેતાં ભગીરથસિંહ મહિપતસિંહ જાડેજાના રહેણાંક મકાનમાં 25 દિવસ પહેલાં રાત્રિના સમયે અજાણ્યા તસ્કરોએ ત્રાટકીને કબાટની તિજોરી તોડી તેમાંથી 35 તોલાના સોના-ચાંદીના દાગીના અને રોકડ રકમ મળી કુલ રૂા.7,76,000 ની માલમતાની ચોરીના બનાવમાં એલસીબીના દોલતસિંહ, હિતેન્દ્રસિંહ અને ફિરોજ ખફી તથા કાલાવડ ગ્રામ્યના પોલીસ સ્ટાફને મળેલી બાતમીના આધારે જિલ્લા પોલીસવડા પ્રેમસુખ ડેલુની સૂચનથી પીઆઈ જે.વી. ચૌધરી, પીએસઆઈ એસ.પી.ગોહિલ તથા સ્ટાફના સંજયસિંહ વાળા, હરપાલસિંહ સોઢા, ભરતભાઈ પટેલ, શરદભાઈ પરમાર, દિલીપભાઈ તલાવડિયા, ભગરથસિંહ સરવૈયા, હરદીપભાઈ ધાંધલ, અશોકભાઈ સોલંકી, વનરાજભાઇ મકવાણા, ધાનાભાઈ મોરી, યશપાલસિંહ જાડેજા, હિતેન્દ્રસિંહ જાડેજા, અજયસિંહ ઝાલા, શિવભદ્રસિંહ જાડેજા, નિર્મળસિંહ જાડેજા, રાકેશભાઈ ચૌહાણ, કિશોરભાઈ પરમાર, સુરેશભાઇ માલકિયા, દયારામ ત્રિવેદી, બિજલભાઈ બાલસરા, ધર્મેન્દ્રસિંહ જાડેજા તથા કાલાવડ ગ્રામ્ય પોલીસ સ્ટાફે વોચ ગોઠવી જામનગરના ચાંદીબજારમાંથી ચોરાઉ મુદ્દામાલ વેંચવા આવેલા મધ્યપ્રદેશના ધાર જિલ્લાના ચામરજર ગામના મુકેશ છગન અલાવા નામના શખ્સને દબોચી લીધો હતો.
એલસીબીની ટીમે મુકેશ અલાવાની તલાસી લેતા તેના કબ્જામાંથી રૂા.1,72,500 ની કિંમતના સોનાના બે ચેઈન, સોનાની બે લકકી, સોનાની એક વીટી તથા રૂા.7000 ની કિંમતના ચાંદીના બે જોડી સાંકળા, ચાંદીની ગાય એક, ચાંદીના સીકકા બે અને રૂા.10000 ની રોકડ રકમ તથા રૂા.5000 ની કિંમતનો એક મોબાઇલ મળી કુલ રૂા.1,94,500 ની માલમતા કબ્જે કરી પૂછપરછ હાથ ધરતા બેડીયા ગામની ચોરીમાં મુકેશની સાથે તેના જ વતનના સુકા રાયસીંગ મકવાણા અને ભુરા મકવાણા નામના બે શખ્સોની સંડોવણી હોવાની કેફીયત આપતા એલસીબીની ટીમે અન્ય બે શખ્સોની શોધખોળ માટે તપાસ આરંભી હતી.
