પોક્સોના ગુન્હામાં અદાલત દ્વારા આરોપીને 20 વર્ષની સખત જેલ અને ભોગ બનનારને રૂપિયા ચાર લાખનું વળતર ચૂકવવા હુકમ કર્યો છે.
આ કેસની વિગત મુજબ હાલ જામનગરના જોડિયા તાલુકાના મોરાણા ગામે રહેતાં પરિવારની સગીર વયની પુત્રીને જોડિયા તાલુકાનો આરોપી સંજય વેલજી મકવાણા બે વર્ષ પૂર્વે સગીરાને લલચાવી ફોસલાવી લગ્નની લાલચ આપી અપહરણ કરી કાયદેસરના વાલીપણામાંથી ભગાડી ગયો હતો. જે અંગે ભોગ બનનારના પિતાએ જોડિયા પોલીસ સ્ટેશનમાં ફરિયાદ નોંધાવી હતી. આરોપી ભોગ બનનારને સામખિયાળી લઇ ગયો હોય ત્યાંથી સાંતલપુર તેના કોઇ મિત્રની વાડીએ લઇ ગયો હતો. જ્યાં સગીરા સાથે જબરદસ્તીથી શરીરસંબંધ બાંધ્યો હતો. ત્યારબાદ સગીરાને અલગ અલગ શહેરોમાં લઇ ગયો હતો.
સગીરાના પિતા દ્વારા થયેલ ફરિયાદના આધારે જોડિયા પોલીસએ આરોપીની ધરપકડ કરી કોર્ટમાં રજૂ કરતાં કોર્ટ દ્વારા આરોપીને જ્યુડિશિયલ કસ્ટડીમાં મોકલવામાં આવ્યો હતો. જામનગર સ્પેશિયલ પોક્સો કોર્ટમાં ચાલતા સરકારપક્ષે દસ્તાવેજી પુરાવાઓ તથા વકીલની દલીલો ઘ્યાને લઇ આરોપી સંજય વેલજી મકવાણાને તકસીરવાન ઠરાવી કુલ 20 વર્ષની સખત કેદની સજા તથા રૂા. 4 લાખ ભોગ બનનારને સરકારી સહાય યોજના હેઠળ વળતરપેટે ચૂકવવાનો હુકમ કર્યો છે.આ કેસમાં સરકારપક્ષે જામનગરના સિન્યિર મદદનીશ જિલ્લા સરકારી વકીલ મુકેશકુમાર પી. જાની રોકાયા હતા.
