જામનગરના વેપારીઓ અને ઉદ્યોગકારો દ્વારા જીએસટીના વિવિધ પ્રશ્નો તેમજ આઈટીસી રિફંડ સહિતની મુશ્કેલીઓ અંગે થોડા સમય પહેલાં વિશાળ રેલી યોજી આવેદનપત્ર મારફતે રજૂઆત કરવામાં આવી હતી. આ રજૂઆતને પગલે જીએસટી વિભાગ દ્વારા સ્થાનિક કક્ષાએ ઉકેલી શકાય તેવા પ્રશ્નોના નિરાકરણ માટે જામનગરમાં મહત્વની બેઠક યોજવામાં આવી હતી.
જામનગર ચેમ્બર ઓફ કોમર્સ એન્ડ ઇન્ડસ્ટ્રી, જામનગર ફેક્ટરી ઓનર્સ એસોસિએશન તેમજ દરેડ પ્લોટ એન્ડ શેડ હોલ્ડર્સ એસોસિએશન ફેઝ-૨ અને ફેઝ-3ના હોદ્દેદારોની ઉપસ્થિતિમાં યોજાયેલી આ બેઠકમાં જીએસટીના વિવિધ પ્રશ્નો અંગે વિસ્તૃત ચર્ચા કરવામાં આવી હતી. ખાસ કરીને વેપારીઓ અને મેન્યુફેક્ચરર્સને જીએસટી પ્રક્રિયા દરમિયાન પડતી મુશ્કેલીઓ, આઈટીસી રિફંડના પ્રશ્નો તથા જામનગરના સ્ટેટ લેવલ સહીતના પ્રશ્નો અંગે અધિકારીઓ સમક્ષ રજૂઆતો કરવામાં આવી હતી.
બેઠકમાં જુનાગઢ વિભાગના જીએસટી વિભાગના જોઈન્ટ કમિશનર ડી. એન. યાજ્ઞિક, તેમજ જામનગરના ડે. કમિશનર હિતેશ દેસાઈ સાહેબ દ્વારા ત્રણેય એસોસિએશનના હોદ્દેદારોની રજૂઆતો સાંભળવામાં આવી હતી. વેપારીઓ દ્વારા રજૂ કરવામાં આવેલા વિવિધ મુદ્દાઓની નોંધ લેવામાં આવી હતી અને સ્થાનિક કક્ષાએથી જે પ્રશ્નોનું નિરાકરણ શક્ય હોય તેવા પ્રશ્નો ઉકેલવા માટે હકારાત્મક અભિગમ દાખવવામાં આવ્યો હતો. જામનગર ફેક્ટરી ઓનર્સ એસોસિએશન પ્રમુખ રામજીભાઈ પટેલ, દરેડ પ્લોટ એન્ડ શેડ હોલ્ડર્સ એસોસિએશનના પ્રમુખ વિષ્ણુ પટેલ સહિતના વેપારીઓ-ઉદ્યોગકારો જોડાયા હતાં.
વેપારી સંગઠનો અને જીએસટી વિભાગ વચ્ચે સંકલન પર ભાર
બેઠકમાં માત્ર હાલના પ્રશ્નોના ઉકેલ અંગે જ નહીં પરંતુ આગામી સમયમાં વેપારીઓ અને જીએસટી વિભાગ વચ્ચે વધુ સારા સંકલન સાથે કામ કરવાની દિશામાં પણ ચર્ચા કરવામાં આવી હતી.
વેપારીઓ અને ઉદ્યોગકારોના વિવિધ સંગઠનો સ્થાનિક જીએસટી કચેરીના સંકલનમાં રહીને વિભાગને પડતી તેમજ વેપારીઓને પડતી મુશ્કેલીઓ અંગે પરસ્પર ચર્ચા અને સંકલન કરશે અને શક્ય તેટલી ઝડપથી તથા સરળ રીતે પ્રશ્નોનું નિરાકરણ આવે તે માટે પ્રયાસો કરવામાં આવે તેવી દિશામાં બેઠકમાં ચર્ચા થઈ હતી.
આ વ્યવસ્થાના કારણે કોઈ પ્રશ્ન ઊભો થાય ત્યારે વેપારીઓને વારંવાર અલગ-અલગ કચેરીઓના ધક્કા ન ખાવા પડે અને સ્થાનિક કક્ષાએ જ સંબંધિત અધિકારીઓ સાથે સંકલન કરીને પ્રશ્નને યોગ્ય કક્ષાએ પહોંચાડી તેનો ઉકેલ લાવી શકાય તેવો અભિગમ અપનાવવાની ચર્ચા કરવામાં આવી હતી.
જામનગરના વેપારીઓ અને ઉદ્યોગકારોએ થોડા સમય પહેલાં જીએસટીના પ્રશ્નોને લઈને એકસાથે આવી વિશાળ રેલી યોજી હતી. રેલી બાદ જીએસટી વિભાગને આવેદનપત્ર આપી વિવિધ પ્રશ્નો અને માંગણીઓ અંગે વિગતવાર રજૂઆત કરવામાં આવી હતી.
વેપારીઓની રજૂઆતને પગલે વિભાગ દ્વારા એસોસિએશનોના હોદ્દેદારો સાથે સીધી બેઠક યોજવામાં આવી હતી. આ બેઠકમાં અગાઉ કરવામાં આવેલી રજૂઆતોમાંથી સ્થાનિક કક્ષાએ ઉકેલી શકાય તેવા પ્રશ્નોને અલગ તારવી તેના પર ચર્ચા કરવામાં આવી હતી.
બેઠક દરમિયાન આઈટીસી એટલે કે ઇનપુટ ટેક્સ ક્રેડિટના રિફંડ સંબંધિત પ્રશ્નો અંગે પણ ખાસ ચર્ચા કરવામાં આવી હતી. વેપારીઓ અને મેન્યુફેક્ચરર્સને રિફંડની પ્રક્રિયામાં પડતી મુશ્કેલીઓ તથા પ્રક્રિયાને વધુ સરળ અને ઝડપી બનાવવાની જરૂરિયાત અંગે અધિકારીઓ સમક્ષ રજૂઆત કરવામાં આવી હતી.
વેપારીઓનું કહેવું હતું કે જે વેપારીઓ અને ઉદ્યોગકારો નિયમિત રીતે કાયદાનું પાલન કરીને વ્યવસાય કરે છે તેમને જીએસટીની પ્રક્રિયા દરમિયાન બિનજરૂરી મુશ્કેલી ન પડે અને તેમના હક્કનું રિફંડ તથા અન્ય કાયદેસર પ્રક્રિયાઓ સમયસર પૂર્ણ થાય તે જરૂરી છે.
જામનગરના બ્રાસપાર્ટ ઉદ્યોગ સાથે સંકળાયેલા વેપારીઓ અને મેન્યુફેક્ચરર્સને જીએસટીની કાર્યવાહી દરમિયાન કોઈ પ્રકારનો અન્યાય ન થાય તે બાબતે પણ બેઠકમાં રજૂઆત કરવામાં આવી હતી.
જીએસટીની ચોરી કરનાર અથવા કાયદાનો ભંગ કરનાર સામે કાયદેસરની કાર્યવાહી થવી જોઈએ તેવી વાત સાથે વેપારીઓએ સ્પષ્ટપણે રજૂઆત કરી હતી કે વર્ષોથી નિયમિત રીતે કારખાના ચલાવતા અને વ્યવસાય કરતા બ્રાસપાર્ટના વેપારીઓ તથા મેન્યુફેક્ચરર્સને બિનજરૂરી મુશ્કેલીનો સામનો ન કરવો પડે.
જામનગરનો બ્રાસપાર્ટ ઉદ્યોગ શહેરની ઔદ્યોગિક ઓળખ સાથે જોડાયેલો છે અને મોટી સંખ્યામાં વેપારીઓ, મેન્યુફેક્ચરર્સ તેમજ કામદારો આ ઉદ્યોગ સાથે સંકળાયેલા છે. તેથી જીએસટીની પ્રક્રિયામાં રહેલી વ્યવહારુ મુશ્કેલીઓનો ઉદ્યોગ પર નકારાત્મક પ્રભાવ ન પડે તે માટે વિભાગ અને વેપારી સંગઠનો વચ્ચે સતત સંકલન જરૂરી હોવાનું બેઠકમાં ભારપૂર્વક જણાવાયું હતું.
બેઠકમાં રજૂ થયેલા મુદ્દાઓમાંથી જે પ્રશ્નો સ્થાનિક જીએસટી કચેરીના સ્તરે ઉકેલી શકાય તેવા છે, તેમના ઝડપી નિરાકરણ માટે પ્રયાસો કરવાની અધિકારીઓ દ્વારા ખાતરી આપવામાં આવી હતી.
અધિકારીઓએ વેપારીઓની રજૂઆતો સહાનુભૂતિપૂર્વક સાંભળી હતી અને વિવિધ મુદ્દાઓ અંગે જરૂરી માર્ગદર્શન તથા યોગ્ય કાર્યવાહી કરવાની ખાતરી આપી હતી. જેના કારણે બેઠકમાં ઉપસ્થિત વેપારી આગેવાનોમાં પણ હકારાત્મકતા જોવા મળી હતી.
જોકે, જીએસટી વ્યવસ્થાને લગતા કેટલાક પ્રશ્નો એવા છે કે જેનો ઉકેલ સ્થાનિક કચેરીના સ્તરે શક્ય નથી. આવા રાજ્ય અથવા કેન્દ્ર સરકારના સ્તરના પ્રશ્નો અંગે યોગ્ય કક્ષાએ રજૂઆત કરવાની પણ ખાતરી અધિકારીઓ દ્વારા આપવામાં આવી હતી.
જરૂરિયાત મુજબ આવા પ્રશ્નોને જીએસટી કાઉન્સિલ સહિતની યોગ્ય કક્ષાએ રજૂ કરવામાં આવે અને વેપારીઓની મુશ્કેલીઓ અંગે સરકાર સુધી વાત પહોંચે તે દિશામાં પણ સહકાર આપવાની ખાતરી આપવામાં આવી હતી.
જામનગરના વેપારીઓ અને ઉદ્યોગકારો માટે આ બેઠક મહત્વપૂર્ણ બની રહી હતી. અગાઉ રેલી અને આવેદનપત્ર દ્વારા કરવામાં આવેલી રજૂઆત બાદ જીએસટી વિભાગના અધિકારીઓ અને વિવિધ વેપારી-ઔદ્યોગિક સંગઠનો એક જ ટેબલ પર બેઠા હતા અને પ્રશ્નોના વ્યવહારુ ઉકેલ અંગે ચર્ચા કરી હતી.
ખાસ કરીને સ્થાનિક કચેરી અને વેપારી સંગઠનો વચ્ચે સતત સંકલન રાખીને વિભાગ તથા વેપારીઓ બંનેને પડતી મુશ્કેલીઓની ચર્ચા કરી તેનો વધુ ઝડપી, સરળ અને વ્યવહારુ ઉકેલ લાવવાનો અભિગમ બેઠકમાં સામે આવ્યો હતો.
હવે રજૂ કરવામાં આવેલા પ્રશ્નો પૈકી સ્થાનિક કક્ષાએ ઉકેલી શકાય તેવા મુદ્દાઓમાં ઝડપી કાર્યવાહી થાય અને રાજ્ય તથા કેન્દ્ર કક્ષાના પ્રશ્નો યોગ્ય સ્તરે પહોંચાડવામાં આવે તેવી વેપારી અને ઉદ્યોગકારોની અપેક્ષા છે.
આ બેઠકને જામનગરના વેપારી અને ઔદ્યોગિક વર્ગ દ્વારા જીએસટી વિભાગ સાથેના સંવાદને વધુ મજબૂત બનાવતી મહત્વની પહેલ તરીકે જોવામાં આવી રહી છે. આગામી સમયમાં નિયમિત સંકલન અને ચર્ચાના માધ્યમથી જીએસટી સંબંધિત પ્રશ્નોનું સમયસર નિરાકરણ આવે અને વેપારીઓને પડતી મુશ્કેલીઓમાં ઘટાડો થાય તે માટે બંને પક્ષો દ્વારા સાથે મળીને પ્રયાસો કરવામાં આવે તેવી અપેક્ષા વ્યક્ત કરવામાં આવી છે.
