જોડિયા તાલુકાના મોરાણા બસ સ્ટેન્ડથી બાલંભા જવાના માર્ગ પર જતાં બાઈકસવાર દંપતી પૂરઝડપે બેફીકરાઈથી આવતા ક્રેટા કારના ચાલકે પાછળથી ઠોકર મારી પછાડી દેતા પ્રૌઢાનું મોત નિપજ્યું હતું. જ્યારે બાઈકચાલક પ્રૌઢને ઈજા પહોંચતા સારવાર માટે હોસ્પિટલમાં ખસેડવામાં આવ્યાં હતાં.
અકસ્માતના બનાવની વિગત મુજબ, જોડિયા તાલુકાના મોરાણા ગામના બસ સ્ટેન્ડથી બાલંભા જવાના જૂના માર્ગ પર ભાદરા-આમરણ ધોરીમાર્ગ પર થી લખમણભાઈ નામના પ્રૌઢ તેમના જીજે-10-બીએલ-0206 નંબરના બાઈક પર તેની પત્ની સાથે બુધવારે સવારના 11 વાગ્યાના અરસામાં પસાર થતા હતાં ત્યારે પાછળથી પૂરઝડપે બેફીકરાઇથી આવતી જીજે-36-એફ-4050 નંબરના ક્રેટા કારના ચાલકે આગળ જતી બાઇકને પાછળથી ઠોકર મારી હડફેટે લેતા બાઈકસવાર દંપતી રોડ પર પટકાયું હતું અને અકસ્માતમાં બાઈક પાછળ બેસેલા ભાનુબેન લખમણભાઈ ખોલિયા (ઉ.વ.55) નામના પ્રૌઢાનું ઘટનાસ્થળે જ પતિની નજર સમક્ષ મોત નિપજ્યું હતું. અકસ્માતમાં પ્રૌઢને નાની-મોટી ઈજાઓ પહોંચી હતી.
બનાવની જાણ થતા એએસઆઈ પી.ડી. જરૂ તથા સ્ટાફ તાત્કાલિક ઘટનાસ્થળે દોડી ગયો હતો અને મૃતદેહનો કબ્જો સંભાળી મૃતકના ભત્રીજા ધનસુખભાઈ ખોલિયાના નિવેદનના આધારે કારચાલક વિરુધ્ધ અકસ્માતનો ગુનો નોંધી આગળની કાર્યવાહી હાથ ધરી હતી.
