કોરોનાના આ કપરા કાળમાં અનેક પરિવારોએ પોતાના સ્વજનો ગુમાવ્યા છે. તેવી જ રીતે રાજકોટની પી.ડી.યુ. મેડિકલ કોલેજની બીજા વર્ષમાં અભ્યાસ કરતી એક વિદ્યાર્થીનીનો પરિવાર કોરોનાની ચપેટમાં આવતા તેના માતા-પિતાનું અવસાન થયું હતું . પરંતુ તેણીએ અન્ય લોકોએ પોતાના સ્વજનો ન ગુમાવવા પડે તે માટે કોવિડ હોસ્પિટલમાં ડ્યુટી ચાલુ કરીને લોકોની સારવાર કરવાનું શરુ કર્યું છે.
પી.ડી.યુ. મેડિકલ કોલેજની બીજા વર્ષમાં અભ્યાસ કરતી અપેક્ષા મારડિયાએ. તે પોતાની વ્યથા જણાવતા કહે છે કે, મારા માતા પિતા હવે રહ્યા નથી, જેનું મને ખૂબ જ દુઃખ છે. આ દુ:ખને ભૂલાવીને પણ માનવજાત ઉપર આવી પડેલી આ વિકટ પરિસ્થિતિમાં હું અન્યોને મદદરૂપ થવા માંગુ છું. કોરોના સંક્રમણથી અન્ય લોકોના માતા – પિતાને બચાવીને મારે મારા માતા – પિતાને સાચી શ્રદ્ધાંજલિ આપવી છે. તેણે કહ્યું કે- મારા પરિવારમાં હું, મારા માતા-પિતા અને મારો ભાઈ બધા પોઝિટિવ આવ્યાં. અમને બંને ભાઈ-બહેનને સારવારથી સારું થઇ ગયું. પરંતુ માતા-પિતાનો કોરોનાએ ભોગ લીધો. તેમની સારવાર દરમિયાન ડૉકટરની હાલત જોઇ બહુ દુઃખ થયું. હું મારા માતા-પિતાને તો ના બચાવી શકી પરંતુ બીજાનાં માતા-પિતાને બચાવી શકું તે માટે સામેથી કોવિડ વિભાગમાં ડ્યુટી ચાલુ કરી છે.
