વિશ્વ ટેનિસ દિવસ 2026: જો તમને પહેલાથી ખબર ન હોય, તો ટેનિસ એક રેકેટ રમત છે, અને તે ખૂબ જ લોકપ્રિય છે. એક ટીમ અથવા બે ટીમના ખેલાડીઓ કોર્ટ પર એકબીજા સાથે સામસામે લડે છે જ્યાં સુધી એક ટીમ ચેમ્પિયન ન બને. ટેનિસ મેચ પરિસ્થિતિઓના આધારે 90 મિનિટ અથવા થોડા કલાકો સુધી ચાલી શકે છે. ટેનિસની રમત હંમેશા આપણે આજે જે જાણીએ છીએ તે મુજબ નહોતી. 12મી સદીમાં, એક લોકપ્રિય રમત વધી રહી હતી, અને ઘણા લોકો તેને પ્રેમ કરતા હતા, જેમાં રાજવી પરિવારનો પણ સમાવેશ થતો હતો.
“ગેમ ઓફ ધ પામ” ફ્રેન્ચ લોકો દ્વારા રમાતી એક લોકપ્રિય રમત હતી, અને તેણે “વાસ્તવિક ટેનિસ” નો પાયો નાખ્યો. ફ્રાન્સના લુઇસ X, આ રમતના મુખ્ય પ્રણેતાઓમાંના એક હતા, એટલા માટે કે 13મી સદીના અંત સુધીમાં, તેઓ આધુનિક શૈલીમાં ઇન્ડોર ટેનિસ કોર્ટ બનાવનારા પ્રથમ વ્યક્તિ બન્યા. આ નવી સુવિધા ઝડપથી સમગ્ર યુરોપના શાહી મહેલોમાં ફેલાઈ ગઈ. 16મી સદીમાં રેકેટની રજૂઆત સાથે આ રમત ‘ટેનિસ’ તરીકે જાણીતી બની.
વર્લ્ડ ટેનિસમાં ભારતનો `ગર્લ પાવર’ : કોર્ટ પર યંગ ટેનિસ સ્ટાર્સનો દબદબો
ભારતીય મહિલા ટેનિસમાં અત્યારે એક નવા યુગનો ઉદય થઈ રહ્યો છે. સાનિયા મિર્ઝાની નિવૃત્તિ બાદ ઈન્ટરનેશનલ ટેનિસમાં ભારતનું પ્રતિનિધિત્વ કોણ કરશે તેવો પ્રશ્ન સતત ચર્ચામાં રહેતો હતો, પરંતુ છેલ્લા કેટલાક સમયમાં દેશની યુવા મહિલા ખેલાડીઓએ પોતાના જબરદસ્ત પ્રદર્શનથી આ શંકાઓ દૂર કરી છે. ખાસ કરીને વર્ષ 2025 અને 2026માં જૂનાગઢથી લઈને પૂણે અને કોઈમ્બતુરની યંગ ગર્લ્સે ગ્રાન્ડ સ્લેમ લેવલ અને આઈટીએફ (ITF) ટૂર્નામેન્ટ્સમાં શાનદાર સફળતા મેળવીને વર્લ્ડ ટેનિસમાં ભારતનો ડંકો વગાડ્યો છે. આ યુવા ખેલાડીઓએ સાબિત કર્યું છે કે યોગ્ય તાલીમ અને સખત મહેનતના બળે તેઓ દુનિયાની ટોચની ખેલાડીઓને હરાવવાની ક્ષમતા ધરાવે છે.
જૂનાગઢની જેન્સી કાનાબાર :
ગુજરાત અને ભારત માટે ગૌરવરૂપ સિદ્ધિ હાંસલ કરતાં જૂનાગઢની 14 વર્ષીય ટેનિસ પ્રોડિજી જેન્સી કાનાબારે આંતરરાષ્ટ્રીય સ્તરે ઇતિહાસ રચ્યો છે. જાન્યુઆરી 2026માં મેલબોર્ન પાર્ક ખાતે રમાયેલી ઓસ્ટ્રેલિયન ઓપન એશિયા-પેસિફિક એલિટ અંડર-14 ટૂર્નામેન્ટમાં ચેમ્પિયન બનીને તે આ પ્રતિષ્ઠિત ટાઇટલ જીતનારી પ્રથમ ભારતીય મહિલા ખેલાડી બની ગઈ છે. ફાઇનલ મુકાબલામાં જેન્સીએ શાનદાર કમબેક કરતાં ઓસ્ટ્રેલિયાની મુસેમ્મા સિલેકને પ્રથમ સેટ ગુમાવ્યા બાદ 3-6, 6-4, 6-1થી હરાવીને ટ્રોફી પોતાના નામે કરી હતી. આ ઐતિહાસિક સફળતા અગાઉ તેણે વર્ષ 2025માં આઈટીએફ (ITF) જે 30 અમદાવાદ સિંગલ્સ ટાઇટલ અને ફિલિપાઈન્સના મનિલા ખાતે એશિયન અંડર-14 ટ્રોફી પર પણ કબજો જમાવ્યો હતો. જેન્સી કાનાબાર આશાસ્પદ અને ભવિષ્યની સ્ટાર ટેનિસ ખેલાડી તરીકે ઊભરી છે.
પૂણેની વૈષ્ણવી અડકર :
સિનિયર ટેનિસ સર્કિટમાં પૂણેની 21 વર્ષીય વૈષ્ણવી અડકરે પોતાના શાનદાર પ્રદર્શનથી ભારતીય ટેનિસમાં નવો ઇતિહાસ રચ્યો છે. ફેબ્રુઆરી 2026માં બેંગલુરુ ખાતે રમાયેલી આઈટીએફ (ITF) વિમેન્સ ઓપન ડબલ્યુ100 (W100) ટૂર્નામેન્ટની ફાઇનલમાં પહોંચીને તેણે સૌ કોઈને ચોંકાવી દીધા હતા. વર્ષ 2009માં સાનિયા મિર્ઝા બાદ ડબલ્યુ100 કે તેથી વધુ લેવલની ટૂર્નામેન્ટની ફાઇનલમાં પ્રવેશ કરનારી વૈષ્ણવી પ્રથમ ભારતીય મહિલા ખેલાડી બની ગઈ છે. આ ઐતિહાસિક પ્રદર્શનના આધારે તેણે ડબલ્યુટીએ (WTA) રેન્કિંગમાં એકસાથે 224 સ્થાનની મોટી છલાંગ લગાવીને વર્લ્ડ નંબર 466 રેન્ક હાંસલ કર્યો છે. આ અદ્ભુત સિદ્ધિ સાથે જ વૈષ્ણવી હવે ભારતની નંબર-2 મહિલા સિંગલ્સ ખેલાડી તરીકે પ્રસ્થાપિત થઈ છે. પોતાના આક્રમક બેઝલાઇન પ્લે અને મજબૂત રમતથી તે આંતરરાષ્ટ્રીય સ્તરે ભારતની મજબૂત દાવેદાર બનીને ઊભરી છે.
સહજા યમાલાપલ્લી :
હૈદરાબાદની 25 વર્ષીય સહજા યમાલાપલ્લી હાલમાં ભારતીય મહિલા ટેનિસમાં સૌથી તેજસ્વી નામ છે અને તે વિમેન્સ સિંગલ્સમાં દેશની નંબર-1 ખેલાડી તરીકે પ્રસ્થાપિત થઈ ચૂકી છે. અમેરિકાની સેમ હ્યુસ્ટન સ્ટેટ યુનિવર્સિટીમાંથી કોલેજ ટેનિસ રમ્યા બાદ પ્રોફેશનલ સર્કિટમાં કદમ મૂકનાર સહજાએ અત્યાર સુધીમાં કુલ 4 આઈટીએફ (ITF) સિંગલ્સ અને 1 ડબલ્સ ટાઇટલ પોતાના નામે કર્યા છે. હાલમાં ડબલ્યુટીએ (WTA) રેન્કિંગમાં 397મો રેન્ક ધરાવતી સહજા માટે વર્ષ 2025 ઐતિહાસિક રહ્યું હતું. મેક્સિકોમાં રમાયેલી ડબલ્યુટીએ 125 ટામ્પિકો ટૂર્નામેન્ટમાં યુએસ ઓપનની પૂર્વ ચેમ્પિયન સ્લોન સ્ટીફન્સને હરાવીને તેણે દુનિયાભરનું ધ્યાન ખેંચ્યું હતું. આ ઉપરાંત 2025 મુંબઈ ઓપન ડબલ્યુટીએ 125 ઇવેન્ટમાં સેમિફાઇનલ સુધી પહોંચવાની ઐતિહાસિક સિદ્ધિ અને બિલિ જીન કિંગ કપમાં ભારતનું પ્રતિનિધિત્વ કરતા એશિયા/ઓસનિયા ગ્રૂપ-1માં પોતાની તમામ 5 સિંગલ્સ મેચ જીતવાનો અજેય રેકોર્ડ તેની ટેલેન્ટનો પુરાવો છે. પોતાની ચપળતા, શાનદાર કોર્ટ અવેરનેસ અને બેઝલાઇન પરથી રમાતા પાવરફુલ બેકહેન્ડ શોર્ટ્સના કારણે તે આંતરરાષ્ટ્રીય મંચ પર ભારતની મજબૂત દાવેદાર બનીને ઊભરી છે.
માયા રાજેશ્વરન :
તમિલનાડુના કોઈમ્બતુરની 16 વર્ષીય માયા રાજેશ્વરન (માયા રેવતી) ભારતીય ટેનિસનો સૌથી તેજસ્વી યુવા ઊભરતો તારલો છે. જૂન 2009માં જન્મેલી માયાએ 10 વર્ષની ઉંમરે ટેનિસને પ્રોફેશનલ કરિયર તરીકે અપનાવ્યું હતું. વર્ષ 2025 તેના માટે ઐતિહાસિક રહ્યું, જેમાં તેણે મુંબઈ ઓપન ડબલ્યુટીએ (WTA) 125 ટૂર્નામેન્ટમાં વાઈલ્ડ કાર્ડ એન્ટ્રી દ્વારા સેમિફાઇનલ સુધીની શાનદાર સફર ખેડીને આંતરરાષ્ટ્રીય સ્તરે ચર્ચા જગાવી હતી. તે આ લેવલની ટૂર્નામેન્ટમાં સેમિફાઇનલ રમનારી 2009માં જન્મેલી પ્રથમ ખેલાડી છે. આ ઉપરાંત, ડિસેમ્બર 2025માં તેણે પ્રતિષ્ઠિત ઓરેન્જ બાઉલ અંડર-18 ડબલ્સનું ટાઇટલ પણ જીતીને ઈતિહાસ રચ્યો હતો. તેની અદ્ભુત ટેલેન્ટને ધ્યાનમાં રાખીને તેને સ્પેનમાં આવેલી પ્રખ્યાત રાફેલ નડાલ ટેનિસ એકેડેમીમાં 100% સ્કોલરશિપ સાથે તાલીમ લેવાની તક મળી છે, જ્યાં તેને ભવિષ્યના ગ્રાન્ડ સ્લેમ માટે તૈયાર કરવામાં આવી રહી છે. શાનદાર ફૂટવર્ક અને આક્રમક રમત ધરાવતી માયા ભારતની ‘નેક્સ્ટ બિગ ટેનિસ હોપ’ તરીકે જોવામાં આવે છે.
