જામનગર તાલુકાના કાનાલુસ ગામ નજીક ગત રાત્રિના પસાર થતી લકઝરી બસના ચાલકે સ્ટીયરીંગ પરનો કાબુ ગુમાવતા બસ રોડ પરથી ઉતરીને નીચે પલ્ટી ખાઈ ગઈ હતી. અકસ્માતમાં ઈજાગ્રસ્તોને જી. જી. હોસ્પિટલમાં ખસેડવામાં આવ્યાં હતાં.
અકસ્માતના બનાવની વિગત મુજબ, જામનગર જિલ્લાના કાનાલુસ ગામ પાસેથી પસાર થતી લકઝરી બસના ચાલકે ગત રાત્રિના સમયે સ્ટીયરીંગ પરનો કાબુ ગુમાવી દીધો હતો. જેના કારણે બસ રોડ પરથી ઉતરીને નીચે પલ્ટી ખાઈ ગઈ હતી. બસ પલ્ટી ખાઈ જતાં બેસેલા મુસાફરોના જીવ તાળવે ચોટી ગયા હતાં. મુસાફરોની ચીસોથી વાતાવરણ ગુંજી ઉઠયું હતું. જો કે સદનસીબે મોટી જાનહાની ટળી હતી. અકસ્માતની જાણ થતા પોલીસ કાફલો ઘટનાસ્થળે દોડી ગયો હતો. અને સ્થળ પરથી ઘવાયેલા મુસાફરોને સારવાર માટે જામનગરની જી. જી. હોસ્પિટલમાં ખસેડવામાં આવ્યાં હતાં. પોલીસે અકસ્માતનો ગુનો નોંધવા તજવીજ હાથ ધરી હતી. આ અકસ્માતમાં અંદાજે 10 થી વધુ લોકો ઘવાયા હતાં.
