જામનગર શહેરમાં અન્નપૂર્ણા ચોકડી નજીક આવેલી ઈદ્રીશપીરની દરગાહ પાસે ગતરાત્રિના એક થાર કારે ટક્કર મારતા આઈ-20 કાર બસ સાથે અથડાતા અકસ્માતમાં કારમાં સવાર યુવાનનું ગંભીર ઈજા પહોંચતા ઘટનાસ્થળે મોત નિપજ્યું હતું. જ્યારે અન્ય ત્રણ યુવાનોને સારવાર માટે જી. જી. હોસ્પિટલમાં ખસેડવામાં આવ્યા હતાં.
બનાવની મળતી વિગત મુજબ, ગઈકાલે મોડીરાત્રિના સમયે જામનગર શહેરમાં અન્નપૂર્ણા ચોકડી નજીક આવેલી ઈદ્રીશપીરની દરગાહ પાસેથી પસાર થતી કાળા કલરની થાર ગાડીએ આઈ-20 કારને પાછળથી ઠોકર મારતા કાર એક બસ સાથે અથડાતા અકસ્માત થયો હતો આ ગમખ્વાર અકસ્માતમાં આઈ-20 કારમાં સવાર અફઝલ રહીમભાઇ ચાવડા નામના યુવાનનું શરીરે અને માથામાં ગંભીર ઈજા પહોંચતા ઘટનાસ્થળે જ મોત નિપજ્યું હતું. જ્યારે કારમાં સવાર અન્ય ત્રણ યુવાનોને નાની મોટી ઈજાઓ પહોંચતા સારવાર માટે જામનગરની જી. જી. હોસ્પિટલમાં ખસેડવામાં આવ્યા હતાં. આ બનાવ અંગેની જાણ થતા પીઆઇ વી.એમ. ડોડિયા તથા સ્ટાફ તાત્કાલિક બનાવસ્થળે દોડી ગયો હતો અને પોલીસે મૃતદેહનો કબ્જો સંભાળી પીએમ માટે મોકલી આ બનાવ અકસ્માતનો જ છે કે અન્ય કોઇ કારણ ? તે અંગેની જીણવટભરી તપાસ હાથ ધરી હતી.
