જામનગર ફાયર શાખા 60 મીટરના આધુનિક ટર્ન ટેબલ લેડર સાથે સજ્જ
જામનગર મહાનગરપાલિકાના ફાયર એન્ડ ઇમરજન્સી સર્વિસીસ વિભાગને વધુ સુસજ્જ અને સક્ષમ બનાવવાના ભાગરૂપે મેઈન ફાયર સ્ટેશન ખાતે નવનિર્મિત વાહનો તેમજ આધુનિક સાધન-સામગ્રીનું વિધિવત નિરીક્ષણ હાથ ધરવામાં આવ્યું હતું. મ્યુનિસિપલ કમિશનર દીપેશ કેડિયા સિટી એન્જિનિયર તેમજ ચીફ ફાયર ઓફિસર ભાવેશ જાનીની ઉપસ્થિતિમાં આ સમીક્ષા કરવામાં આવી હતી.
શહેરમાં આકસ્મિક આગ કે અન્ય આપત્તિના સંજોગોમાં તાકીદે રાહત અને બચાવ કામગીરી હાથ ધરી શકાય તે હેતુથી મહાનગરપાલિકા દ્વારા વિવિધ પ્રકારના 10 નવા વાહનો વસાવવામાં આવ્યા છે. આ ઉપરાંત, ઊંચી ઇમારતોમાં બચાવ કાર્ય સુગમ બને તે માટે રાજ્ય સરકાર દ્વારા ખાસ 60 મીટર ક્ષમતા ધરાવતું અત્યાધુનિક ‘ટર્ન ટેબલ લેડર’ (TTL) વાહન પણ ફાળવવામાં આવ્યું છે. આ તમામ વાહનોની કાર્યક્ષમતા અને ક્ષમતાનું કમિશનર દ્વારા જાત-નિરીક્ષણ કરવામાં આવ્યું હતું.
ત્યારબાદ, ફાયર કંટ્રોલ રૂમ ખાતે રાજ્ય સરકાર દ્વારા કાર્યરત કરવામાં આવેલ એકીકૃત આપાતકાલીન સેવા ‘ડાયલ 112’ (Emergency Response Support System) ની કામગીરીનું પણ નિરીક્ષણ કરાયું હતું. નાગરિકો તરફથી મળતા ઇમરજન્સી કોલ્સ, તેના ત્વરિત પ્રતિસાદ અને સંકલન વ્યવસ્થા અંગે તેમણે વિગતવાર સમીક્ષા કરી હતી.
આ મુલાકાત દરમિયાન કમિશનરએ ફાયર સ્ટાફ સાથે સંવાદ સાધી નવા સાધનોની ટેકનિકલ જાણકારી, જાળવણી તેમજ 112 ઇમરજન્સી સેવા સંદર્ભે સમયસૂચકતા અને સત્વર કામગીરી સુનિશ્ચિત કરવા જરૂરી માર્ગદર્શન અને સૂચનો પૂરા પાડ્યા હતા.
જામનગર મહાનગરપાલિકા ફાયર વિભાગને આધુનિક TTL (Turntable Ladder) મશીન મળ્યું છે. આ મશીનનું કમિશનર સહિતના અધિકારીઓ દ્વારા નિરીક્ષણ કરવામાં આવ્યું હતું.
આ મશીનની મદદથી ફાયર વિભાગના જવાનો 60 મીટર સુધીની ઊંચાઈએ પહોંચી શકશે. ઊંચી ઇમારતોમાં આગની ઘટના તેમજ રેસ્ક્યૂ કામગીરી દરમિયાન TTL મશીન ફાયર વિભાગ માટે મહત્વપૂર્ણ સાધન બની રહેશે. નિરીક્ષણ દરમિયાન અધિકારીઓએ મશીનની કાર્યક્ષમતા અને વિવિધ સુવિધાઓની માહિતી મેળવી હતી.
View this post on Instagram
