કાલાવડ તાલુકાના ફગાસ ગામથી માછરડા ગામ તરફ જવાના માર્ગ પર ત્રણ કિ.મી. દૂરથી કોહવાઈ ગયેલો અજાણી મહિલાનો મૃતદેહ સાંપડતા પોલીસે સ્થળ પર પહોંચી જઇ મૃતદેહનો કબ્જો સંભાળી ઓળખ મેળવવા તપાસ હાથ ધરી હતી.
મળતી વિગત મુજબ કાલાવડ તાલુકાના ફગાસ ગામથી માછરડા ગામ તરફ જવાના માર્ગ પર ત્રણ કિ.મી. દૂર માઈલસ્ટોનના પથ્થરથી આશરે 300 ફૂટ દૂર કોઇ 30 થી 35 વર્ષની અજાણી મહિલાનો કોહવાઈ ગયેલો મૃતદેહ પડયો હોવાની રીક્ષાચાલક સતુભા ટેમુભા જાડેજા દ્વારા જાણ કરાતા પીએસઆઈ એચ.વી. પટેલ તથા સ્ટાફ ઘટનાસ્થળે દોડી ગયો હતો અને સ્થળ પર પહોંચીને કોહવાઇ ગયેલી ઓળખ ન થાય તેવી લાશ મળી આવી હતી. મૃતકે રાણી ગુલાબી કલરની રામા કલરના ફુલની ડીઝાઈનવાળી તથા સફેદ એમ્બ્રોડરી વર્ક વાળી કુર્તી તથા રામા કલરની ડીઝાઈન વગરની સલવાર અને ગળાના ભાગે રામા કલરનો ડીઝાઈન વગરનો દુપટ્ટો પહેર્યો હતો તેમજ ગળાના ભાગે કાળા કલરની મોતીવાળી માળા અને લાલ કલરના કાપડનો ધાગો અને જમણા હાથની કલાઈમાં કાળો દોરો તથા ડાબા હાથમાં આછા ગુલાબી કલરની પ્લાસ્ટિક/ફાઈબર ધાતુનો પાટલો પહેરેલો હતો. પોલીસે મૃતદેહનો કબ્જો સંભાળી પીએમ માટે મોકલી મૃતકની ઓળખ મેળવવા તજવીજ હાથ ધરી હતી અને કાલાવડ તથા જિલ્લામાં ગુમ થયેલી મહિલાઓ અંગેની તપાસ પણ હાથ ધરી હતી.ઉપરાંત મૃતક મહિલા અંગેની કોઇ પણ જાણકારી મળે તો કાલાવડ ગ્રામ્ય પોલીસ સ્ટેશનમાં 02894-223533 નંબર ઉપર અથવા મો.9574868746 ઉપર જાણ કરવા પીએસઆઈની યાદીમાં જણાવાયું છે.
