આવકવેરા વિભાગ દ્વારા હૈદરાબાદની ફાર્મા કંપની હેટેરો પર દરોડા પાડવામાં આવ્યા હતા. આ દરોડામાં અધિકારીઓને તિજોરીઓમાંથી રોકડા રૂ.142 કરોડ મળી આવતા તેઓ પણ દંગ રહી ગયા હતા. આવકવેરા વિભાગે કહ્યું હતું કે દસ્તાવેજો તપાસ્યા પછી ખબર પડી કે આ કંપનીએ રૂ. 550 કરોડની કમાણીનો ક્યાંય ઉલ્લેખ જ નથી કર્યો. આ કંપની દુનિયાના 50થી વધુ દેશમાં ભારતમાં ઉત્પાદિત દવાઓની નિકાસ કરે છે.
સેન્ટ્રલ બોર્ડ ઓફ ડાયરેક્ટ ટેક્સ (CBDT) એ કહ્યું કે 6 ઓક્ટોબરના રોજ હૈદરાબાદમાં 50 સ્થળોએ દરોડા પાડવામાં આવ્યા હતા. આ દરમિયાન અત્યાર સુધીમાં લગભગ 550 કરોડ રૂપિયાની બિનહિસાબી આવક મળી આવી છે. જ્યારે 142 કરોડ રૂપિયાથી વધુની રોકડ જપ્ત કરવામાં આવી છે. હાલમાં, કંપનીના અધિકારીઓ તરફથી આ અંગે કોઈ ટિપ્પણી મળી નથી.
સીબીડીટીએ જણાવ્યું હતું કે ગ્રુપ ફાર્માસ્યુટિકલ સામગ્રીનું ઉત્પાદન કરે છે અને મોટાભાગના ઉત્પાદનોની અમેરિકા અને દુબઇ અને કેટલાક આફ્રિકન અને યુરોપિયન દેશોમાં નિકાસ કરવામાં આવે છે. બનાવટી અને બિન-અસ્તિત્વ ધરાવતી સંસ્થાઓમાંથી કરવામાં આવેલી ખરીદીમાં છેતરપિંડી હોવાનું સામે આવ્યું છે. આ સિવાય જમીન ખરીદવા માટે નાણાં ચૂકવ્યાના પુરાવા પણ મળ્યા હતા. કોવિડ-19 ની સારવાર માટે અનેક કરારો પર હસ્તાક્ષર અને વિવિધ દવાઓ જેમ કે રેમડેસિવિર અને ફેવિપિરાવીર જેવી અનેક દવાઓ વિકસિત કરવા માટેના કામોમાં સામેલ હોવાને કારણે હેટેરો જૂથ હેડલાઇનમાં રહ્યું હતું.
