કાલાવડ ગામમાં રહેતાં પટેલ મહિલાને અવાર-નવાર માથુ દુખતુ હોવાથી જિંદગીથી કંટાળીને તેણીના ઘરે ગળેફાંસો ખાઈ આત્મહત્યા કર્યાના બનાવમાં પોલીસે સ્થળ પર પહોંચી જઇ મૃતદેહનો કબ્જો સંભાળી આગળની તપાસ હાથ ધરી હતી.
મળતી વિગત મુજબ, રાજકોટ જિલ્લાના ધોરાજી તાલુકાના ઝાંઝમેર ગામના વતની અને હાલ કાલાવડ ગામમાં સરદારપાર્ક શેરી નંબર 7 માં રહેતાં અને ઇલેકટ્રીકનો વ્યવસાય કરતા હિતેશભાઇ મનસુખભાઈ અજુડિયા નામના પટેલ યુવાનના પત્ની રશ્મિબેન હિતેશભાઈ અજુડિયા (ઉ.વ.39) નામના મહિલાને ખંજવાળની તકલીફ હતી અને અવાર-નવાર માથાનો દુ:ખાવો થતો હોવાથી જિંદગીથી કંટાળીને બુધવારે વહેલી સવારના 07:30 વાગ્યાના અરસામાં તેણીના ઘરે ગળેફાંસો ખાઈ આત્મહત્યાનો પ્રયાસ કર્યો હતો ત્યારબાદ મહિલાને સારવાર માટે હોસ્પિટલમાં ખસેડવામાં આવી હતી. જ્યાં તેણીનું મોત નિપજ્યાનું ફરજ પરના તબીબોએ જાહેર કર્યું હતું. આ બનાવ અંગે મૃતકના પતિ દ્વારા જાણ કરાતા એએસઆઈ વી.ડી. ઝાપડીયા તથા સ્ટાફે હોસ્પિટલ પહોંચી જઇ મૃતદેહનો કબ્જો સંભાળી પીએમ માટે મોકલી આગળની કાર્યવાહી હાથ ધરી હતી.
