દેશના ઓલ ઇન્ડિયા બેંક એમ્પ્લોયીઝ એસોસિએશન દ્વારા એલાન કરવામાં આવ્યું છે કે, આવતીકાલે ત્રીજી ફેબ્રુઆરીના દિવસે રાષ્ટ્રીય વિરોધ દિન મનાવવામાં આવશે. વિવિધ માંગણીઓના અનુસંધાને જુદાં-જુદાં કાર્યક્રમો આપવામાં આવશે.
એસોસિએશન દ્વારા ગુજરાતભરના મીડિયાગૃહોને પ્રચાર અને પ્રસાર અર્થે જણાવવામાં આવ્યું છે કે,કેન્દ્ર સરકાર લેબરકોડ અને ઇલેકટ્રિસીટી બીલ પડતું મૂકે. આ ઉપરાંત ખાનગીકરણનો વિરોધ કરવામાં આવ્યો છે. આ સાથે એવી પણ માંગણી કરવામાં આવી છે કે, પ્રત્યેક ગરીબ કામદારને નિશ્ર્ચિત આવક તથા ખાદ્યાન્ન સહાય આપવી જોઇએ. આ ઉપરાંત તાજેતરના બજેટના જે જન વિરોધી નિતીઓ દર્શાવવામાં આવી છે. તેના વિરોધમાં આવતીકાલે રાષ્ટ્રીય વિરોધ દિન ઉજવવામાં આવશે.
એસો.એ એવું જાહેર કર્યુ છે કે, દેશભરમાં વ્યાપક દેખાવો કરવામાં આવશે અને આ દેખાવો કામના સ્થળો અને ઔદ્યોગિક વિસ્તારોમાં પણ યોજવામાં આવશે.આ ઉપરાંત સરકારના લેબરકોડની નકલોની હોળી કરવામાં આવશે.
