પગના દુખાવાથી કંટાળીને પ્રૌઢે ટ્રેન હેઠળ ઝંપલાવ્યું

કલ્યાણપુર તાલુકાના રાવલ ગામમાં રહેતા પ્રૌઢને પાંચ વર્ષથી થયેલા પગના ઘુંટણના દુખાવાની સારવાર કરાવવા છતાં દુ:ખાવો મટતો ન હતો. જેથી જિંદગીથી કંટાળી કુરંગા નજીક ટ્રેન હેઠળ ઝંપલાવી આપઘાત કર્યો હતો.

બનાવની વિગત મુજબ, કલ્યાણપુર તાલુકાના રાવલ ગામે રહેતા પાલાભાઈ સામનભાઈ ગામી નામના 55 વર્ષના કોળી પ્રૌઢને છેલ્લા પાંચેક વર્ષથી પગના ઘૂંટણમાં દુખાવો થતો હોય, આ દુખાવાની તેમણે ઘણા સમયથી દવાઓ લીધી હતી. તેમ છતાં પગનો આ દુખાવો મટતો ન હતો. જેથી કંટાળીને તેમણે ગઈકાલે દ્વારકા નજીકના કુરંગા ગામ પાસેના રેલવે ટ્રેક પરથી પસાર થઈ રહેલી ટ્રેન હેઠળ ઝંપલાવી દેતા તેમનું મૃત્યુ નીપજ્યું હતું. આ બનાવ અંગે મૃતકના પુત્ર લાખાભાઈ દ્વારા જાણ કરાતા દ્વારકા પોલીસે સ્થળ પર પહોંચી જઈ મૃતદેહનો કબ્જો સંભાળી પીએમ માટે મોકલી આગળની કાર્યવાહી હાથ ધરી હતી.