જામનગર મહાનગરપાલિકા દ્વારા દબાણ દૂર કરવાની કામગીરી કરવામાં આવે છે, ત્યારે મનપાની પોતાની કામગીરીમાં જ અન્ય સરકારી વિભાગની જમીન પર બાંધકામ કરાયાનો મામલો સામે આવ્યો છે. વિકાસ ગૃહ રોડ વિસ્તારમાં વોર્ડ ઓફિસ માટે બાંધકામ કરવામાં આવ્યું હતું. જોકે, બાંધકામ શરૂ કરતા પહેલાં આ જગ્યા કોની માલિકીની છે તેની પૂરતી તપાસ કરવામાં આવી ન હોવાનો મુદ્દો સામે આવતા મનપાની કામગીરી સામે ગંભીર સવાલો ઊભા થયા છે.
મનપાને વોર્ડ ઓફિસ માટે જગ્યા જરૂરી હોવાથી પડતર જગ્યા નજરે પડતાં અહીં બાંધકામ કરવાની દરખાસ્ત કરવામાં આવી હતી. ત્યારબાદ સ્થળ પર બાંધકામની કામગીરી શરૂ કરવામાં આવી હતી. જોકે, સરકારી જમીન પર બાંધકામ શરૂ કરતાં પહેલાં જમીનનો રેકર્ડ, માલિકી હક અને સંબંધિત વિભાગની મંજૂરી અંગેની જરૂરી ચકાસણી કરવામાં આવી હતી કે નહીં તે અંગે હવે પ્રશ્નો ઊભા થયા છે.
વોર્ડ ઓફિસનું બાંધકામ આગળ વધ્યા બાદ જે જગ્યા પર કામગીરી થઈ રહી હતી તે મનપાની માલિકીની નહીં પરંતુ જામનગરની એમ.પી. શાહ મેડિકલ કોલેજની હોવાનું સામે આવ્યું હતું. આમ, જમીનની માલિકી અંગેની હકીકત બાંધકામ શરૂ કરતા પહેલાં નહીં પરંતુ કામગીરી શરૂ થયા બાદ સામે આવતાં સમગ્ર મામલો ચર્ચામાં આવ્યો છે.
View this post on Instagram
જમીન મનપાની ન હોવાનું સામે આવ્યા બાદ હવે મહાનગરપાલિકા દ્વારા એમ.પી. શાહ મેડિકલ કોલેજના ડીનને પત્ર લખીને આ જગ્યા મનપાને આપવા માટે વિનંતી કરવામાં આવી છે. મનપા દ્વારા વોર્ડ ઓફિસ માટે આ જગ્યાની જરૂરિયાત હોવાનું જણાવી જગ્યા ફાળવવા અંગે રજૂઆત કરવામાં આવી છે. આમ, જમીન પોતાની છે કે નહીં તેની ખાતરી કર્યા વિના બાંધકામ અને ત્યારબાદ જમીન મેળવવા માટેની પ્રક્રિયા શરૂ કરાયાની સ્થિતિ સર્જાઈ છે.
મહાનગરપાલિકાની મુખ્ય જવાબદારીઓમાં શહેરમાં ગેરકાયદે બાંધકામ અને દબાણ સામે કાર્યવાહી કરવાનો પણ સમાવેશ થાય છે. શહેરમાં સરકારી જમીન પર થયેલા દબાણો દૂર કરવાની કાર્યવાહી કરતી મનપા સામે જ હવે સરકારી વિભાગની જમીન પર બાંધકામ કર્યાનો સવાલ ઊભો થયો છે. જેના કારણે મનપાની જમીન ચકાસણી અને વહીવટી પ્રક્રિયા સામે પણ ચર્ચા શરૂ થઈ છે.
આ સમગ્ર મામલામાં સૌથી મોટો સવાલ એ છે કે વોર્ડ ઓફિસનું બાંધકામ શરૂ કરતા પહેલાં જમીનની માલિકી અંગે તપાસ કેમ કરવામાં આવી નહીં. દરખાસ્ત તૈયાર કરતી વખતે જમીનનો રેકર્ડ ચકાસવામાં આવ્યો હતો કે નહીં, સ્થળ ચકાસણી કોણે કરી હતી અને જમીન મનપાની છે કે અન્ય સરકારી વિભાગની તે અંગે ખાતરી કર્યા વગર બાંધકામની કામગીરી કેવી રીતે શરૂ થઈ તે મુદ્દે સ્પષ્ટતા જરૂરી બની છે.
બાંધકામ શરૂ થયા બાદ જો જમીન મનપાની નહીં હોવાનું સામે આવ્યું હોય તો અત્યાર સુધીમાં થયેલા બાંધકામ ખર્ચ અંગે પણ સવાલ ઊભો થાય છે. જો ઉચ્ચ કક્ષાએથી આ જમીન મનપાને ફાળવવામાં નહીં આવે તો બાંધકામ પાછળ કરવામાં આવેલા ખર્ચની જવાબદારી કોની રહેશે તે પણ મહત્વનો પ્રશ્ન છે. બીજી તરફ જો જમીન મનપાને ફાળવવામાં આવે તો પણ બાંધકામ પહેલાં જમીનની માલિકી અંગેની તપાસ કેમ ન થઈ તે સવાલનો જવાબ આપવો પડશે.
જામનગરમાં અગાઉ મનપા દ્વારા સરકારી જમીન પરથી મોટા પાયે દબાણ દૂર કરવાની કાર્યવાહી કરવામાં આવી હતી. આરટીઆઈમાં મળેલી માહિતી મુજબ સપ્ટેમ્બર 2024થી જુલાઈ 2025 દરમિયાન આશરે 9.60 લાખ ચોરસ મીટર સરકારી જમીન પરથી દબાણ દૂર કરવામાં આવ્યું હતું. હવે અન્ય સરકારી વિભાગની જમીન પર મનપાનું બાંધકામ થયાનો મામલો સામે આવતા દબાણ હટાવતી મનપાની કામગીરી સામે જ વિસંગતતા અંગે સવાલો ઉઠી રહ્યા છે.
મેડિકલ કોલેજની જમીન અંગે સ્થાનિક કક્ષાએ નિર્ણય લેવાની સત્તા ન હોવાથી મનપાની જગ્યા મેળવવાની માંગણી ઉચ્ચ કક્ષાએ મોકલવામાં આવી હોવાનું જાણવા મળે છે. હવે આ જગ્યા મનપાને ફાળવવામાં આવશે કે નહીં તે અંગે નિર્ણયની રાહ જોવાઈ રહી છે. જોકે, જમીન ફાળવાય કે નહીં, બાંધકામ પહેલાં માલિકીની ચકાસણી કેમ કરવામાં આવી નહીં તે મુદ્દો યથાવત્ રહેશે.
વોર્ડ ઓફિસ જેવી જાહેર સુવિધા માટે બાંધકામ કરવું જરૂરી હોઈ શકે છે, પરંતુ સરકારી જમીન અંગેની માલિકીની ખાતરી કર્યા વગર બાંધકામ શરૂ કરવાની પ્રક્રિયા સામે હવે ગંભીર પ્રશ્નો ઊભા થયા છે. મનપાએ આ મામલે જમીનની ચકાસણી કોણે કરી, બાંધકામ માટેની દરખાસ્ત કયા આધારે કરવામાં આવી અને અત્યાર સુધીમાં કેટલો ખર્ચ થયો તેની વિગતો જાહેર કરવી જરૂરી બની છે.
સમગ્ર મામલામાં હાલ સૌથી મોટો સવાલ એ જ છે કે પહેલા જમીનની માલિકી તપાસવાને બદલે પહેલા બાંધકામ કેમ કરવામાં આવ્યું અને બાંધકામ થયા બાદ જમીન પોતાની પાસે રાખવા માટે માગણી કેમ કરવી પડી? હવે મનપા તંત્ર દ્વારા આ સમગ્ર મામલે શું ખુલાસો કરવામાં આવે છે અને બેદરકારી માટે જવાબદારી નક્કી થાય છે કે નહીં તેના પર નજર રહેશે.
