લાલપુર તાલુકાના મીઠોઇ ગામમાં આવેલા વાડી વિસ્તારમાં રહેતાં શખ્સના ખેતરમાંથી પોલીસે રેઈડ દરમિયાન દારૂના જથ્થા સાથે શખ્સને ઝડપી લીધો હતો. જામનગર તાલુકાના કોંઝા ગામમાંથી પસાર થતા શખ્સની પોલીસે તલાસી લેતા તેની પાસેથી દારૂની ચાર બોટલ મળી આવતા અટકાયત કરી પૂછપરછ હાથ ધર હતી.
દરોડાની વિગત મુજબ, પ્રથમ દરોડો લાલપુર તાલુકાના મીઠોઇ ગામના સીમ વિસ્તારમાં આવેલી અર્જુનસિંહ લાખુભા ચુડાસમાના ખેતરમાં દારૂનો જથ્થો હોવાની મેઘપર પોલીસને મળેલી બાતમીના આધારે રેઈડ દરમિયાન તલાસી લેતા ખેતરમાં રાખેલા તુવેરના ભુક્કામાં સંતાડેલી રૂા.4000 ની કિંમતની આઠ બોટલ મળી આવતા પોલીસે અર્જુનસિંહની ધરપકડ કરી પૂછપરછ હાથ ધરી હતી.
બીજો દરોડો, જામનગર તાલુકાના કોંઝા ગામમાં બાવીસી માતાજીના મંદિર પાસેથી પસાર થતા દશરથસિંહ નવલસિંહ ભટ્ટી નામના શખ્સને પંચકોશી બી ડિવિઝન પોલીસ સ્ટાફે આંતરીને તલાસી લેતા તેના કબ્જામાંથી રૂા.2000 ની કિંમતની દારૂની ચાર બોટલ મળી આવતા પોલીસે દશરથસિંહની ધરપકડ કરી ગુનો નોંધી આગળની તપાસ હાથ ધરી હતી.
