જાંબુડા પાટીયા નજીક કારે ઠોકર મારતા બાઈકસવારનું મોત

જામનગર તાલુકાના જાંબુડા ગામના પાટીયા નજીકથી પૂરઝડપે બેફીકરાઈથી પસાર થતી કારના ચાલકે બાઈકને ઠોકરે ચડાવતા પ્રૌઢનું મોત નિપજ્યું હતું. અકસ્માતના બનાવ બાદ ચાલક કાર લઇ નાશી ગયો હતો.

અકસ્માતના બનાવની વિગત મુજબ, જામનગર તાલુકાના મોટી બાણુગાર ગામમાં રહેતા નારણભાઈ પરમાર નામના પ્રૌઢ ગત તા.7 ના સોમવારના સાંજના સમયે તેના બાઈક પર જાંબુડા ગામના પાટીયા પાસેથી પસાર થતા હતાં તે દરમિયાન પૂરઝડપે બેફીકરાઈથી આવતી જીજે-10-સીજી-7080 નંબરની કારના ચાલકે બાઈકને ઠોકરે ચડાવી હડફેટે લેતા અકસ્માત થયો હતો. આ અકસ્માતમાં નારણભાઈ પરમારને શરીરે અને માથામાં ગંભીર ઈજા પહોંચતા મોત નિપજ્યું હતું. અકસ્માત બાદ ચાલક નાશી ગયો હતો. બનાવ અંગેની મૃતકના પુત્ર શામજીભાઈ દ્વારા જાણ કરાતા પીએસઆઈ બી.એસ. વાળા તથા સ્ટાફે સ્થળ પર પહોંચી જઈ મૃતદેહને પીએમ માટે મોકલી કારચાલક વિરૂધ્ધ ગુનો નોંધી આગળની કાર્યવાહી હાથ ધરી હતી.