108 આવે તે પહેલાં જ અકસ્માત સ્થળે પહોંચી ઇજાગ્રસ્ત મહિલાને સારવાર માટે જી.જી. હોસ્પિટલ પહોંચાડી, પરિવારજનોએ પોલીસની સંવેદનશીલ કામગીરીને બિરદાવી
જામનગરમાં નવરાત્રિ પર્વ દરમિયાન બેડી મરીન પોલીસની ‘શી ટીમ’ દ્વારા માનવતાભર્યું કાર્ય કરવામાં આવ્યું હતું. નવરાત્રિના કાર્યક્રમમાંથી પરત ફરી રહેલા એક પરિવારના બાઈકને અકસ્માત નડતાં પરિવારની મહિલા સહિતના સભ્યો મુશ્કેલીમાં મુકાયા હતા. આ ઘટનાની જાણ થતાં જ બેડી મરીન પોલીસની ‘શી ટીમ’ તાત્કાલિક અકસ્માત સ્થળે પહોંચી હતી.
પરિવારજનોના જણાવ્યા અનુસાર, નવરાત્રિના કાર્યક્રમમાં હાજરી આપીને પરત ફરતી વખતે બાઈક સ્લીપ થતાં અકસ્માત સર્જાયો હતો. આ ઘટનાને પગલે તેમણે 108 એમ્બ્યુલન્સને જાણ કરી હતી. જોકે, એમ્બ્યુલન્સ પહોંચે તે પહેલાં જ બેડી મરીન પોલીસની ‘શી ટીમ’ ઘટનાસ્થળે પહોંચી ગઈ હતી.
પોલીસની ‘શી ટીમ’એ સમયસર મદદ કરીને ઇજાગ્રસ્ત મહિલા અને પરિવારના સભ્યોને તાત્કાલિક સારવાર માટે જી.જી. હોસ્પિટલ પહોંચાડવાની વ્યવસ્થા કરી હતી. પોલીસની આ ત્વરિત કામગીરીને કારણે અકસ્માતના સમયે પરિવારને જરૂરી મદદ મળી હતી.
આ સમગ્ર ઘટનાને લઈને પરિવારના એક સભ્યએ પોલીસ સ્ટેશનમાં પોતાની આપવીતી રજૂ કરી હતી અને બેડી મરીન પોલીસની ‘શી ટીમ’એ કટોકટીના સમયે જે રીતે મદદ કરી તે બદલ આભાર વ્યક્ત કર્યો હતો.
નવરાત્રિ દરમિયાન કાયદો અને વ્યવસ્થા જાળવવાની જવાબદારીની સાથે નાગરિકોની સુરક્ષા અને જરૂરિયાતના સમયે મદદ માટે તત્પર રહેતી પોલીસની આ કામગીરી પ્રશંસનીય બની છે. બેડી મરીન પોલીસની ‘શી ટીમ’ની સમયસૂચકતા અને માનવતાભર્યા અભિગમને પરિવારજનોએ બિરદાવ્યો હતો.
View this post on Instagram
