જામનગર શહેરના 9 વર્ષીય બાળ પર્વતારોહક વિહાન ચેતરીયાએ હિમાચલ પ્રદેશના કુલ્લુ-મનાલી વિસ્તારમાં આવેલ અતિ પડકારજનક ફ્રેન્ડશિપ પીક (ઊંચાઈ 5,289 મીટર)નું સફળતાપૂર્વક આરોહણ કરીને નવો કીર્તિમાન સ્થાપ્યો છે.
વિહાને માત્ર 9 વર્ષ અને 4 મહિનાની ઉંમરે આ સિદ્ધિ હાંસલ કરીને અગાઉનો 10 વર્ષ અને 2 મહિનાની ઉંમરનો રેકોર્ડ તોડી નાખ્યો છે. આ સાથે વિહાન ચેતરીયા ફ્રેન્ડશિપ પીક સર કરનાર ભારતનો સૌથી નાની ઉંમરનો પર્વતારોહક બન્યો છે.
ફ્રેન્ડશિપ પીક હિમાલયના લોકપ્રિય પરંતુ ટેક્નિકલ શિખરોમાંનું એક ગણાય છે. આ શિખરનું આરોહણ કરવા માટે પર્વતારોહણની વિશેષ ટેક્નિકલ કુશળતા, બરફ અને હિમનદી વિસ્તારમાં ચાલવાની તાલીમ, ક્રેમ્પોન, આઈસ-એક્સ, રોપ જેવી વિશિષ્ટ સાધનસામગ્રીનો યોગ્ય ઉપયોગ તેમજ ઉત્તમ શારીરિક ક્ષમતા, માનસિક મજબૂતી અને અડગ મનોબળ જરૂરી હોય છે.
વિહાને આ અભિયાન દરમિયાન અત્યંત કપરા હવામાન, ઓક્સિજનના ઘટાડેલા સ્તર અને બરફથી ઢંકાયેલા જોખમી માર્ગોનો સફળતાપૂર્વક સામનો કરીને શિખર સર કર્યું હતું. તેની આ સિદ્ધિ માત્ર વ્યક્તિગત સફળતા નથી, પરંતુ સમગ્ર ગુજરાત માટે ગૌરવની ક્ષણ છે.
વિહાન અગાઉ પણ હિમાલયના વિવિધ ટ્રેક અને શિખરો સફળતાપૂર્વક પૂર્ણ કરી ચૂક્યો છે અને બાળ પર્વતારોહણ ક્ષેત્રે સતત નોંધપાત્ર સિદ્ધિઓ હાંસલ કરી રહ્યો છે. તેની આ ઐતિહાસિક સફળતા રાજ્યના બાળકો અને યુવાનોને સાહસિક રમતો, પર્વતારોહણ અને પ્રકૃતિપ્રેમ તરફ પ્રેરિત કરશે.
વિહાન ચેતરીયાની આ અસાધારણ સિદ્ધિ બદલ વિવિધ સામાજિક, શૈક્ષણિક અને રમતગમત ક્ષેત્રની સંસ્થાઓ દ્વારા તેને અભિનંદન પાઠવવામાં આવી રહ્યા છે. જામનગરના આ નાનકડા સાહસિકે સમગ્ર ગુજરાતનું નામ રાષ્ટ્રીય સ્તરે ગૌરવભેર ઉજ્જવળ કર્યું છે.
