જામનગર શહેરમાં ગુરૂદ્વારા પાસેથી પસાર થતી કારને એલસીબી ટીમે આંતરીને તલાસી લેતા કારમાંથી 21 બોટલ દારૂ મળી આવતા પોલીસે રૂા.3.13 લાખની કિંમતના મુદ્દામાલ સાથે શખ્સને ઝડપી લઇ પૂછપરછ હાથ ધરતા સપ્લાયર સહિતના બે શખ્સોની સંડોવણી ખુલ્લી હતી. જામનગરના નવાગામ ઘેડમાં રહેણાંક મકાનમાંથી સિટી બી ડીવીઝન પોલીસ સ્ટાફે રેઈડ દરમિયાન દારૂની બે બોટલો કબ્જે કરી શખ્સની શોધખોળ આરંભી હતી. જામનગરના ઢીચડા ગામમાં આવેલી કરિયાણાની દુકાનમાંથી એલસીબીએ રેઈડ દરમિયાન 48 નંગ બીયરના ટીન કબ્જે કરી શખ્સની ધરપકડ કરી હતી.
દરોડાની વિગત મુજબ, પ્રથમ દરોડો, જામનગર શહેરમાં ગુરૂદ્વારા પાસેના રોડ પરથી પસાર થતી કારમાં દારૂનો જથ્થો હોવાની ધાના મોરી અને ક્રિપાલસિંહ જાડેજાને મળેલી બાતમીના આધારે પોલીસ અધિક્ષક પ્રેમસુખ ડેલુની સૂચનાથી પીઆઈ જે.વી. ચૌધરી, પીએસઆઇ આર.કે. કરમટા, એસ.પી. ગોહિલ, પી.એન. મોરી તથા સ્ટાફના સંજયસિંઈહ વાળા, હરપાલસિંહ સોઢા, ભરતભાઈ પટેલ, નાનજીભાઈ પટેલ, દિલીપભાઈ તલવાડિયા, હરદીપભાઈ ઘાઘલ, વનરાજભાઈ મકવાણા, ધાનાભાઈ મોરી, હિતેન્દ્રસિંહ જાડેજા, અરજણભાઈ કોડીયાતર, મયુદીનભાઈ સૈયદ, ક્રિપાલસિંહ જાડેજા, નિર્મળસિંહ જાડેજા, કિશોરભાઈ પરમાર, હરદીપભાઇ બારડ, ઋષિરાજસિંહ વાળા, મયુરસિંહ પરમાર, કલ્પેશભાઈ મૈયડ, ધર્મેન્દ્રસિંહ જાડેજા, દયારામ ત્રિવેદી, બિજલભાઈ બારાસરા સહિતના સ્ટાફે વોચ ગોઠવી બાતમી મુજબની જીજે-03-જેઆર-8273 નંબરની અર્ટીગા કારને આંતરી હતી.
એલસીબીની ટીમે કારની તલાસી લેતા તેમાંથી રૂા.8400 ની કિંમતની 21 નંગ ઈંગ્લીશ દારૂની બોટલો મળી આવતા પોલીસે જીતેન્દ્ર ઉર્ફે જેકી લીલાધર ભદ્રા નામના શખ્સને દારૂની બોટલ અને પાંચ હજારની કિંમતનો મોબાઇલ તથા કાર મળી કુલ રૂા. 3,13,400 ના મુદ્દામાલ સાથે ઝડપી લઇ પૂછપરછ હાથ ધરતા આ દારૂનો જથ્થો મંગાવવામાં કમલેશ દામાની અને સપ્લાય કરનાર વાપીના પંકજ ભાનુશાળીનું નામ ખુલતા એલસીબીએ ત્રણ શખ્સો વિરૂધ્ધ ગુનો નોંધી તપાસ આરંભી હતી.
બીજો દરોડો, જામનગર શહેરમાં નવાગામ ઘેડમાં રહેતાં ભાવેશ ચમનભાઈ ડાથિયાના મકાનમાં દારૂનો જથ્થો હોવાની બાતમીના આધારે સીટી બી ડીવીઝન પોલીસ સ્ટાફે રેઈડ દરમિયાન રૂા.1000 ની કિંમતની બે બોટલો કબ્જે કરી નાશી ગયેલા ભાવેશની શોધખોળ આરંભી હતી.
ત્રીજો દરોડો, જામનગર શહેરના ઢીચડા ગામમાં આવેલા બંસી પ્રોવીઝન સ્ટોર્સ નામની કરિયાણાની દુકાનમાં બીયરનો જથ્થો હોવાની હેકો મયુદ્દીન સૈયદ અને અરજણ કોડીયાતરને મળેલી બાતમીના આધારે એલસીબીની ટીમે રેઈડ દરમિયાન દુકાનમાંથી રૂા.4800 ની કિંમતની 48 નંગ બીયરના ટીન અને પાંચ હજારની કિંમતનો મોબાઇલ મળી કુલ રૂા.9800 ના મુદ્દામાલ સાથે પોલીસે હિતેશ નેમચંદ જાકરીયા નામના શખ્સની ધરપકડ કરી પૂછપરછ હાથ ધરતા આ બીયરના જથ્થામાં સબીર જુમા દોદેપુત્રા કોટાઈની અને સપ્લાય કરનાર પોરબંદરના નયન સીકોતરાના નામો ખુલતાં એલસીબીએ ત્રણ શખ્સો વિરૂધ્ધ ગુનો નોંધી તપાસ આરંભી હતી.
