કોરોનાના કેસમાં 44 ટકાનો ઉછાળો

દેશમાં કોરોનાના નવા કેસમાં ફરી એકવાર તેજી નોંધાઈ છે. ગઈકાલની સરખામણીમાં આજે નવા કેસોમાં 44 ટકાનો વધારો થયો છે. જો કે એક્ટિવ કેસોની સંખ્યામાં સતત ઘટાડો થઈ રહ્યો છે. કેન્દ્રીય સ્વાસ્થ્ય મંત્રાલયના આંકડા અનુસાર દેશમાં આજે છેલ્લા 24 કલાકમાં નવ હજારથી વધુ નવા કેસ નોંધાયા છે. આજે દેશમાં 9,629 નવા કેસ નોંધાયા હતા જ્યારે ગઈકાલે આ આંકડો 6,660 હતો. આ ઉપરાંત સક્રિય કેસ ઘટીને 61,013 થઈ ગયા છે જે ગઈકાલે 63,380 હતા.

આરોગ્ય મંત્રાલયના ડેટા અનુસાર છેલ્લા 24 કલાકમાં 29 મૃત્યુ નોંધાયા સાથે મૃત્યુઆંક વધીને 5,31,398 થયો છે. આ 29 મૃત્યુમાંથી દિલ્હીમાં છ, મહારાષ્ટ્ર અને રાજસ્થાનમાં ત્રણ-ત્રણ, હરિયાણા અને ઉત્તર પ્રદેશમાં બે-બે અને ઓડિશા, ગુજરાત અને છત્તીસગઢમાં એક-એક મૃત્યુ નોંધાયા હતા. કેરળમાં દસ લોકોના મોત થયા હતા.